سئلت وواجبي رد الاجابه = اجاوب سايلي والجو هادي
وحنا ليا نصتنا مانتعذر = أخذنا من الجبل سبعة هوادي
نجاوب بالجواب اللي يبرهن = ولانحسب لها حر وبرادي
يقول اللي سألني في سواله = يقول من أي قوم من البوادي
سال والعلم خلفه علم ثاني = حسب مبدا سواله واعتقادي
يبين بنطق مضمون العباره = عن اللي عامد الغلطه اعمادي
وان من باب فخري واعتزازي = اجاوب سايلي قول وكادي
اجاوب كل كلمه من سواله =ولااحط الجيم والمضمون ضادي
اجاوب سايلي حسب اطلاعي = جواب شامل ماهو انفرادي
جواب مادخل بالزور وايضا = احسّب قبل ما بديه انتقادي
جوابي كلمةٍ منها وفيها = شعاع النور مع قدح الزنادي
اجابه ساسها يرفع بناها = يرويها الشيخ للي بالمهادي
انا من حرب والقوم الحريبه = هل الردات في يوم التنادي
اقوله وانتبه للي بقوله = كلام له براهين وسنادي
خبرنا كان ماتعرف خبرنا = خبرنا بالوفا ماهو بعادي
لنا في سيرة المعصوم سيره = ولنا تاريخ مع سيد العبادي
حضرنا ياعميلي فتح مكه = تحت راية لمن للدين قادي
ودليل القول محصان عددنا = ألفنا وزدنا بالعدادي
الفنا ولاالف سوانا = وشفيع الخلق يدعو للجهادي
وبعض الناس مذكور عددهم = وبعض الناس تاريخه حيادي
دام التاريخ اشاد بمجد ربعي = تسلي يام سالم بالدوادي
تسير القافله بخطا رزينه = ولو صوت المباري فيه زادي
وازيدك علم لو مانته بقده = لكن السيف سل من الغمادي
بلدنا كان ماتعرف بلدنا = عليه النور من منشاه بادي
سكنها واستعان بمن سكنها = بعونة واحد يحي الجمادي
بدا نور البريه من بلدنا = وضفا نوره على كل البلادي
وآمن من كان يومن بالحقيقه =ورفض من جاك علمه يالمرادي
وخضع والنار تسعر في غصونه = ولازالت بعروق الكدادي
سناها من لهبها في هدبها = وتموت النار واتلاها رمادي
وترى قولي له التاريخ شاهد = يبين العلم مع طول التمادي
نقول الصدق والنفس العليله = تداوى بالزبيدي والزبادي
وكلام مايبرهن مانقوله = ونقول لقايله قولك ربادي
وزيد اللي سمع تمجيد قومي= كلام واقعه جسر اعتمادي
اقوله وافتخر به يوم اقوله = وابي له منك يا السايل ملادي
خبرنا بالوفا عزز جبرنا = وركبنا به على وسق الشدادي
جلدنا في خوي القوم سته = وعن التاشير قطعنا الايادي
واخذنا الثار في من كان معنا = خوي القوم في مزود وزادي
وباقه من نقل حتفه لكتفه = وبدا فعل المثاري بالسدادي
جلد سته وقيل انها الملامه = ويمنى خال المثاري فيه زادي
ولنا ميقاف تشهد به اعدانا = من اجل الجار بنحور الاعادي
فدينا الجار بالنفس الزكيه = وقفلنا الباب من دون السوادي
فعول ما فعلها اللي تبجح = يشيد بسيرته في كل نادي
واذا عدنا لمزايا حرب قلنا = مزايا سلمنا ماهي جداي
ورثناها من اللي قد ورثها= على عصر بن منذر وبن عادي
اهل شيمه واهل عطف وتسامح = واهل شده اذا حل العنادي
وتلقا العلم عن سوقة جملنا = على وضح النقا ماهو هجادي
ويجيك العلم عن بيت مبنى = ونشّد وين ابوسبعة عمادي
يجيك العلم عنا ويتثنى = على سمع لخازوقه ينادي
مزايانا بها تحشم الحانا = بذكر الطيب والا بالهنادي
منا من يعط الخيل الاصيله = ومنا من يعط الهجن التلادي
ومنا من يعط العرب الجلايل = ومنا من يعطي صلبات العضادي
ومنا فكاكة البوش المطرف = ومراتع بوشهم وسط الحمادي
ومنا من يكرم الضيف وقصيره = على الميسور كنه في عيادي
اهل خيل لها صوله وجوله = واهل شلف لها روس حدادي
مضاربها ليا منا نوينا = تفج الجسم مع وصط الفوادي
يعرفها من جلب نفسه لاهلها = على ظهور السبايا بالطرادي
مغاوير على قب طلايع = صناديد عن الواجب نفادي
ومراتعنا بنجد اللي تسمى = ديار الخيل وعراض التوادي
لنا فيها السنام من البسيطه = دكاكة عرق والاسيف وادي
ولنا فيها مواريد رويه = ولنا فيها مقاطين ومنادي
واقول لحرب يا حسامي ودرعي = وذراي وظل راسي واستنادي
اعذروني بمجد ماذكرته = قصر عن بعض مغزاي اجتهادي
ذكرت اللي مضى منا وعنا = وصدى التاريخ فيما قلت اشادي
قبيله شأنها شان القبايل = ويسب الناس من خافيه رادي
وكل فيه حقه من رجاله = تسير الناس بسلوم ومبادي
لعل الله يعز اللي خشرها = والف بين النداوي والحنادي
الّفهم بالشريعه والعداله = وساوى بينهم والامن سادي
وحول دارهم عقب المجاعه = الى دار الرخا والاقتصادي
لاشك اللي يضايق كل عاقل = عدم مسك البعض خط الحيادي
وانا ماهمني قول السفاسف = لكن عليان يقزيه القرادي
تحملنا الخطايا بالمجامل = وتبين مثل ماقال المهادي
يشب النار من يوقد حطبها = ويطف النار من رايه سدادي
ويجيب السالفه من لايعرفها = ويضيع المهتدي مع درب غادي
جذور المر ابو ليلى زرعها = ولها من خلف ابو ليلى امتدادي
وكان العقال تضحك خلف جاهل = على روس الثمر حل الجرادي
ونقلها من حملها ولااحتملها = وجهز منشار عنتر للحصادي
وتعود مثل ماكانت ويعرف = من له بالقسا عزم وجلادي
ويندم من بدا بالشر ناره = مباد ركبها منها استفادي
يقولون العرب من كان يزعم = بكيد الناس لابده يكادي
وختم الفاف في قول الكريزي = برده يوم يرسل لابن هادي
كفى والحر تكفيه الاشاره = وتطوف اسماع مدن بالرقادي