المشاركة الأصلية كتبت بواسطة حسين مريع العبيدي

احترت انا فالوقت والفكر حاير= تهنا وفينا ماتفيد النصايح
نمدح كثير المال لو كان جاير= من كثر ماله نال كل المدايح
لو كان صك الباب عن كل زاير= وايديه ممنوعه عن امر الصلايح
يقال له سيد في كل العشاير= ويسجل اسمه في علو اللوايح
لو كان هذا المال جا من خساير= مال الفقارى والفقارى نوايح
تجار تلعب في بنوك العزاير= مضاربه بالمال والضرب جايح
والا قناةٍ بعد موت الضماير= تنشر قبايح مابعدها قبايح
متكبرين ورافعين الستاير=ويبغون جمع المال لو بالفضايح
ياهل العقول النيره والبصاير=قولو لراع المال وين انت رايح
ترى التكبر من كبار الكباير = وراع التكبر مايجيب الربايح
ومدحٍ كسبته من نفوسٍ صغاير=اصبح غبارٍ مع هبوب الروايح
الطير مهما كان فالجو طاير=لابد من يومٍ على الا رض طايح
ياسرع مادارت عليك الدواير=وتندم على مالٍ بقي فالصفايح
المدح في سلم العرب والسواير=للطيبين اهل العطا والسمايح
المدح للي تالي الليل ساير= ينصى الفقير اللي من الفقر نايح
وليا لفاه الضيف يلقى البشاير= ويلقى دلالٍ فوقها الهيل فايح
وان جاه مضلومٍ يهل العباير=هو نجدة المضلوم وان صاح صايح
يصبح بخيل المال فالوحل غاير=وراع العطا والجود فالفوز بايح
نبينا بشر وحط النذاير= بين هل الا فساد واهل الفلايح
عليه صلى الله مادار داير=فوق السما والا على الا رض سايح