يا خوي المودّه فيه علم ودليله = جاك مني محمّل فوق كور المطيه
حللّه حسب رايك والمعاني جزيله =وسّع الصدر وافهم والعلوم ابرحيه
مانجاهر بسو ولانحب الهزيله = ولانعاتب ضعيف ولانحب الاذيه
والمصالف مخالف فيه غيره بديله= وان هرجنا هرجناوالضمايرنقيه
والجمال الاصيله للحمول الثّقيله = والجمال الهزيله مالها قابليه
جيت لك يازميلي فوق ظهر الاصيله= في عتاب ومودّه ونت حلمك عليه
ان بغيت القصيره وان بغيت الطويله= ماتورّيت سوه واحتسب للقضيه
واحد ماعرفته عقب مااقفا مديله = قام يزرع هراس بدرب راع العبيه
فيه رايي تغير عقب ماشفت ميله = له اسلوب مخالف له علوم خفيه
لانذمّه بفعل ولانتعرض سبيله = يمكن انه مشبّع بالظفروالحميه
قالوا انه كريم وله فعول جميله = ماشي في طريقه مايحب الاذيه
لكن اللي سمعته مايناسب عميله = مثل ما اهدى لغيري خصني في هديه
قل لمستورقل له قبل يلعب بذيله = السيوف معبيه والحقوق محميه
والسليمه سليمه والعليله عليله = والرجل من لسانه والرديه رديه
كل حرف يسجل فيه عندي مزيله= وعندنا للمحرّف فهم ميه بميه
عيب مستورالاول زمرته في حصيله = والاوادم برايه كلبوها غبيه
وعيب مستورالآخرمايشيل بشليله = من اشروخ يبيها للصخور القويه
ياخوي المودّه قل له يصون جيله = كلنا يابو راضي من اعيال القريه
واختلاف المواهب واختلاف الفصيله=مايسبب تخطي للرجال البريه
ذا كلامي وزندي عند خشم الفتيله = لكن اصبر واجامل والامور مغطيه
والمعادي قبالي والليالي طويله = جعل ابو زيد يجنح للعلوم الوفيه
ابحث العلم جدّوطيب باحسن وسيله= ابن عمك غشيش ولايقدر خويه
لاتكلم بضعف ولاتحرث المليله = قل لصاحبك يتبع ما ومربه نبيه
والنهايه ياطيب علمنا في مشيله = احفظه ونت سالم مع قبول التحيه