لا تسألوني عن مدى حبّي وعشقـي للقصيـد=الشعر ديوان العرب ياللي تعـرف أخبارهـا
لأحدٍ يلوم الشاعر إن كانه يبي يصهر جليـد=كم شاعرٍ قبلي قدر سيّـل جميـع أنهارهـا
ما نقشت حروف فكري لأجل معنى ما يفيـد=ولا طلبت أدخل معارك لو بخاف أخطارهـا
كانك تبيها بالفخر خذها من الـراس العنيـد=خلّك صبـورٍ يافتـى إليـا كوتـك بنارهـا
خذها جزاله وافيه من فكر واضـح مايحيـد=عن جود ربعٍ بالعطا تثمر جميـع أشجارهـا
ربعي جبالٍ نايفه ياللـي تناظـر مـن بعيـد=العز سحـبٍ للرجـال وأفعالهـم أمطارهـا
وإن كان تبغاها حِكم هذي دروبـي يايزيـد=الغايه اللي لأجلهـا أشعلـت كـل أنوارهـا
استوطن إحساسي بها وأستفحل الشعر الزهيد=وصارت معاني كلمتي للناس تجني ثمارهـا
خلّك سنَد تبني بلَـد ولا تاقـف لوقفـة بليـد=خلّك عطـوفٍ ياولـد بكبارهـا وصغارهـا
لو إرتفع سهم الخوي سهمك يزيـد ويستزيـد=مثل المؤشر لأرتفع يرفـع جميـع أسعارهـا
وشلون تقدر تستظـل بظـل وافـر ياشريـد=والبعـض يطـرد تايـهٍ بيستظـل بدارهـا
لو طار حرٍ بالسما لا تحسبـه شـيٍ فريـد=ترى الفريد بهالزمن ( الناس طار حمارهـا)