عبرت عن مضمون رأيـي ببيتيـن=رأيي وكـل ٍ هقوتـي حـر بريـاه
إن كنت صايب رأي خوذوه هالحيـن=وإن كنت مخطي كل مخطي له أخطاه
وأنا بشـر مانـي مشـرع قوانيـن=ولا ني رسول ولا أتعالـى علـى الله
لكن كلامـي لـه ثبـوت وبراهيـن=ومـن لا يصدقنـي يجـرب ويلقـاه
اللي بقلبه بغض فـي وجهـه يبيـن=لا تنشـده وجهـه يبيـن خفـايـاه
يبيـن بغضـه بنعقـاد الحجاجيـن=تظهر تقاسيـم الحقـد فـي محيـاه
والبغض صفه من صفات البغيضيـن=ومن قـال : فيهـم طيبيـن أتحـداه
وثق ثقه لو تعطي المبغـض العيـن=تعطيـه مـن ماتملكـه كلـه أغـلاه
وتقـدره تقديـر الأبنـاء للأبـويـن=لا ناقص ٍ بغضه ولا زايـد إرضـاه
مهما تسوي زين ما شاف لك زيـن=أطيـب مـا تفعـل مايغيـر نوايـاه
يشوف منك بعينـه الجانـب الشيـن=هذا هو اللـي عنـك يبقـى بذكـراه
حتى تقول : أنا معه رايحـن ويـن=أمشي وراه مـن أول العمـر لتـلاه
والسالفـه ماهـي موالـف بعاريـن=حتـى توالـف مـن يلقيـك علبـاه
إليا إجتمع في داخل المبغض إثنيـن=بغض وحسد لو هو ولد عمك إنسـاه
سوى مـن الأقصيـن وإلاّ المواليـن=ترى الرجاء منه إنقطـع لا ترجـاه
احسب حسابه من حساب المعاديـن=وعيّد إليـا فارقـك وإفـرح بفرقـاه
مير البلا كانه مـن أدنـى القريبيـن=الدم من قربـه جمعـك أنـت ويـاه
مثل مـا غيـرك يبتلـى بالمعاقيـن=إصبـر عليـه وقـلـه الأمــر لله
لايضيق بك جولك على شأن مسكين=وتضيف لك عوجاً رديفـه لعوجـاه
أقبل نصيبك والدهـر لـه معاويـن=وكل ٍ بهالدنيـا حصـل لـه معانـاه
والله بتكوينه فـرق بيـن الأخويـن=هـذا رفـع حظـه وذا حظـه أرداه
تشوف بعد الفـرق بيـن الشقيقيـن=هذا ضعيف وذاك ما تلحـق أقصـاه
وإن شفت مبلي قل بدل نعـم نعميـن=تكفى لا تضحـك بـه وتبـلا بلـواه