خذيت جوله على كل المـدن لكـن=الهم والغم داخـل بالمـدن ساكـن
يالمدن صيرن عسل والروح تفادكن=والطيبه طيبه مـن حـظ راعيهـا

سلام مني على اللي لا قراء خطي=حيا حجاجه قبل ينطق بها السانـه
اشوف رجل مشى واخر بدا يخطي=وبعض البشوت الكبيره مالها خانه

ترى المدن تختلف من ديره لديـره=بعض المدن جو زين و طعمها شيره
و البعض تحتاج وقت اكثر لتطويره=و الطيبه طيبها من حـظ راعيهـا

يا مرحبا بك من الشطِّي الى الشطِّـي=تحية(ن) ما بها زيـف(ن) و مليانـه
بعض الرجاجيل سمح و بعضهم شطِّي=و ما كل بشت(ن) سِتَرْ لو جرّ قيطانه

صحيح بان المدن من بينهن فرقاء=واليا لقيت العلا يم العـلا فرقـاء
والبعض منهن ياليته يعلن الفرقاء=والطيبه طيبه من حض راعيهـا

دام البقاء بالذي ممشاه مع خطي=وافي وفي والوفي ماهس ميزانه
انا قريت الكتاب وعارف المخطي=واليا بغيت الاشاره قلت لك عانه

لولا الفرووق بعباده خربت الدنيا=نظرة بعضهم لفوق و بعضهم دنيا
و الناس أجناس تختلف المعادنيا=و الطيبه طيبها من حظ راعيهـا

حنا على الدرب نرفع صوت و نوطّي=و نردد بصوتنا دانـه علـى دانـه
يا ليتنا بالطريق نسير مـا نوطّـي=كلّ(ن) على قدر لحفه مـد كرعانـه

دنيا دنيه تفـرق ماتجمـع بشـر=نسعى على خير لكن انتفاجاء بشر
لو البشاير تباع اقول نشري بشر=والطيبه طيبه من حـظ راعيهـا

ياسامع الصوت وافقني على شرطي=اقطف من الورد ورده واترك الشانه
طريقنا ما يوقف وسطـه الشرطـي=يكفي من الطيب ريح المسك واخوانه

ـهذي سواة الحيـاة بجزرهـا و المـد=تاخذ من الناس مرات اكثر مـن المـد
و من كال فيها بخس في صاعها و المد=و الطيبه طيبهـا مـن حـظ راعيهـا

موافقك حتى لو ان الجفن مـا غَطّـي=و يدي مليانة(ن) بالورد مـن شانـه
و الى بدى لي القمر و فرحت به غِطّي=و الظاهر المسألة يا شيـخ خربانـه

ياعايش الوقت حاول تدمح الزله=ازرع لها الطيبه ووزن لها الزله
ما ينتقارن بفرش المد والزلـه=والطيبه طيبه من حض راعيها

ازهم على اللي يشيل القاف ويحطي=قله ترى الناس يابن الناس شرهانه
يا ام القراء دوني ثم اسمعي حطي=المبصره مبصره ماهـي بعميانه