المشاركة الأصلية كتبت بواسطة صقر المراقيب

اسمع يامضحي شرح ينبي عن الحال=منك انتظر مردود يابن الحموله
قليله بحقك إلا قلت رجال=وفاك متعدي حدود الرجوله
عايش حياه مسلسل ٍ كله اهوال=واخذت يامضحي عليه البطوله
من ناس يامضحي تعقّد لي حبال=شي ٍ يهون وشي ياكبر هوله
وانا عدوّي راعي القيل والقال= لاصدّقوه الناس فاللي يقوله
عزي لمن يصغي على هرجته بال= يصير عقله كنه بحجم فوله
وانا عزيز ولا اقرب دروب الانذال= عرق الوفا فيني قويه اصوله
صادق ضميري مايجيبوه بالمال= لا والذي بالحق ارسل رسوله
الضيف يلقى عندنا فال وعقال= ومن زارنا في دارنا مانغوله
نقوم بالواجب على طيب منزال= لو هو عدو مانجرحه في نزوله
والغدر دربه مالنا فيه مدخال= رفيقنا شر العدا مايطوله
والله عليم ٍ بالنوايا والاعمال= الشر لازاله صعيب ٍ حصوله
هذا هو المضمون ياذرب الاخصال= صاحبك في وقته مضيّع حلوله