لامال بك وقتك وجاك يتهايل=وضاقت عليك وزوّد الصاع صاعي
أعرف ترى بالناس راعي جمايل=طيب وطيبه صدق ماهو صناعي
أنصاه وأترك فاعلين الهزايل=اللي يكبونك وراهم تراعي
أنصى هل الفزعات والراس طايل=مال المواقف غير صلب الذراعي
اللي على الطالات والعز نايل=تشوف في وجهه بياض وشعاعي
ياكثر شكله مع عيال الحمايل=اللي منازلهم تجي بالرفاعي
أهل النقا والمرجله والنفايل=وأهل المكارم طيبين الطباعي
الله مجملهم بوسط القبايل=وتاريخهم في كل مجلس يذاعي
الطيب وهبه والمواقف دلايل=ومن لاوقف بين الرجاجيل ضاعي
والمدح لولا طيبين الفعايل=ماصار له بين المخاليق داعي
والصدق حجه والسوالف مخايل=ومن لاصدق في كلمته مايطاعي