سرا ليلي وليلك وليل المعنى طاب=بعد شاف يافواز بالعين مزيونه
تباها بحسنن يسلب القلب والالباب=وثوبن يحير الفكر في شكله ولونه
عريبة نسب تستاهل المدح والاعجاب=وعزيزة حسب من كل الاطراف مامونه
هنوف على بيض الورق في ذرا واحجاب=مثل درتن في قاعة البحر مكنونه
قصيده لايمكن دونها تقفل الابواب=ترجح على الكفه دواوين موزونه
على راس ابوها تاج الابداع والاداب=هذا الشاعر اللي يتقن الشعر وفنونه
وهذا الصاحب اللي من على جملة الاصحاب=تعلى وراع الطيب بالطيب يطرونه
هلا مرحبا من شاعرن هاجسه ماغاب=يعد الصحيح ومنطق الصدق مظمونه
لون الصراحه نوب تكوي كما المشهاب=وكم واحدن من نطقها تكثر اغبونه
يافواز من خاض التجاريب راسه شاب=ونوايا العرب تعرف من اللي يقولونه
قرينا وشفنا واتفقنا على الاسباب=والاسرار في صندوق الاسرار مدفونه
يقول المثل ماضاع حقن وله طلاب=وكلن يغني حسب عرفه وقانونه
وانا اقول صعبه تعتدل عوجة الارقاب=يطيح القصر لاطاح ركنن من اركونه
وكلن يحدد له محله من الاعراب=يعمرون قصر العز والا يهدمونه
مصير اللحى ياصاحبي في ذرا الاشناب=وعلم السعد وافين الاريا يعدونه
يقولون لاطاح الزناتي برمح اذياب=ابوزيد تالع جمرته فوق غليونه