خلك سفير الوجه طلق المحيَّا=والهقوة اللي فيك خلك حراها
دنياك مثل الشمس من بعد فيَّا=ياكم واحد حرته مادراها
لو كنت راقي فوق وسق الثريَّا=لابد من يومٍ توَسَّق ثراها
وأنا موصَّا قَبْل من والديَّا= أربع خصال تنومس اللي قَرَاها
لاتهيل في الميلات مع كل هيَّا=ولاكل كلمة مدح تجري وراها
ولاتحتزم بين الرجاجيل عيَّا=ولا ضفت ربعٍ لا تحاقر قِرَاها
ولو قلت بعض الناس ماهي سويَّا=الناس كلٍ ماشيه في سراها
أقول لاعساك ماتشوف سيَّا=وتبقى البيوت اللي يذري ذراها
قال المثل ( حنا عيال القريَّا )=مانجهل اللي باعها واشتراها
لكن نصيحة لك من دون شيََّا=النفس مرهونة لمن هو براها
اغنم طريق الحق مادمت حيَّا=نعم الغنيمة اللي موثًّق عراها