يامدور ٍ بالليل طيب التعاليل = عند الرجال اهل النبا والسماحه
بن اليمن ينسيك بن البرازيل = لو ينحمس في روقة ٍ وانشراحه
سلام مني عد وبل المخاييل = في ديرة ٍ بالصيف فيها سياحه
ياصلك يارمز الوفا والتكاميل = يااللي على الجزلات صابت رماحه
ابن القروم مقدرين الرجاجيل = اللي لهم بارض المراجل مساحه
من بعدها نبدا نجر المواويل =حتى نترجم حزننا بالنياحه
بالوقت يامضحي لقيت البهاذيل = اشرب هماجه بعد لذة قراحه
والدمع من عيني يبل المناديل = لو ابتسم ياخوك ماني براحه
اصبر ودوّر خيرها بالمقابيل = والصبر شيمة قاصدين الفلاحه
لاوالذي ارسل طيور ٍ ابابيل = على الذي مبداه كله وقاحه
ماجوّر في مخلوق لايمكن اميل = لو كان شفت الجور زايد كلاحه
لي شيمة ٍ تعلا على كل ماقيل = تحد قلبي صابر ٍ في جراحه
جتك القصيده وان قريت التفاصيل = عجل بردك وانت راع الفصاحه