يابنت ياللي من الصغر وديتك = للمدرسة وعلمتك وربيتك
وشلتك وفي وسط الحشا حطيتك = أنت ثمر قلبي ولحمي ودمي
مالله عطاك اخوات يالنشمية = لكن عطاك العقل والحنية
واصبح معاك أخوات فوق المية = من الزميلات وبنات العمي
لك منزلة مابينهم مرموقة = وحسن البنادم من حسن منطوقه
لك قول مثل الشهد يوم نذوقه = وقولن يأثر في الصخور الصمي
ماريد أشوفك في الحياة مهمومة = وسنين عمرألآدمي معلومة
والعبد وين يروح من مقسومه = أمرن كتبه الله لزوم يتمي
خلي التسامح والصبر من طبعك = وغذي ينابيع الوفا من نبعك
يافخر لخوانك وابوك وربعك = ويزول لامني نظرتك همي
وقومي بدينك والصلاة صليها = وفروضها باوقاتها أديها
والسيئة بالطيبة لاقيها = اللي يصوط السم هو ينسمي
والوالدة جوف الحشا حطيها = وطيعي اوامرها ولاتعصيها
الأم يرضي الرب ما يرضيها = وحقوقها ما تنحصي بالكمي
واخوك لامني ذكرت اخوانك = ذراك اذا مال الزمان وخانك
صغيرهم حطيه جوف أعيانك = يسقيك شربة من قراح الجمي
ووصيك ولد العم قومي دونه = وخليك في وقت اللزم في عونه
وفي البيت خلك قايمة بشؤونه = بنت الرجال برجلها تهتمي
وعليك واجب واحترام لعمك = ابو محمد لا تزايدهمك
مقام ابوك ومن لحمك ودمك = وتريه في منزل أبوي وعمي
وأللي كماك مجار ماوصيها = لكن ابا ذكرك باللي فيها
كتبتها قصدي عليك أهديها = مادمت حي وشملنا ملتمي