المشاركة الأصلية كتبت بواسطة غازي الوهبي

يااليل ماودي بخوتك عامين=ابي السموحة منك والشك زايل
تراي من ناس على العهد وافين=واهل الوفا يبقا لهم من سلايل
وانته مسامح ياخوي المحبين=اعداد ماهلت صدوق المخايل
وخذ الوصاة اللي عليها حريصين=لاهل العلوم الطيبه والفعايل
خذ القلم مع دفتري والكتابين=وخذ السراج ولعته والفتايل
عشرين عام اللي بخوتك عشرين=ام نشيل الهم ولاانت شايل
الله من سر حفظناه الاثنين= وعليه وصيت الضلوع النحايل
ياما جعلت الليل يصير ليلين=ام على القيفان ولا الرحايل
من اولا لاسلهمت نظرة العين=اللي بنظرتها تضيع الدلايل
الحب بلوى والقصايد براهين= خصا على الثنتين لاصرت نايل
واليوم عن طرد المزين بريين= يحول من دونه ثلاثين حايل
والعمر لامن صارخمس وثلاثين=يصير في راسك امور وبدايل
والطيش واشعاره وحب المجانين= ماتت على الجوال عند الرسايل
اليوم حتى العشق سلم الوراعين=لاجيت وسط السوق شفت الهوايل
ماتفرقه عنها اليا صارو اثنين=مخصر ثوبه ونوب ايتمايل
ويمكن يزود اشوي باللطف وللين=ويبي يساويها بطول الجدايل
كلمة بكلمة في نظام الجديدين=ورسالة بلاتوث وسط العوايل
من بعدها يبدا غرام المحبين=ياخذ ثلاث ايام ويصير طايل
الوقت ماهو وقتنا اللي على الزين=وحنا نبيها في سلوم القبايل
والثانيه قصايدي بالثمانين=ماجبتها من شان كثر المثايل
اجيبها في مجلس فيه غالين=اليا انشدوني مهتوين الجزايل
اللي لدار الهرج وسط الدواوين=تلقى الرجال اللي تعد الجمايل
مثل لاجيت عضيب نعمين نعمين=بمقابله تشفى الهموم الغلايل
في مجلسه تلقى رجال حشيمين=وبدر يسوق امبهرات الاوايل
ولا لاجيت اديار قفر وبساتين=وشبيت نارك مع عيال الحمايل
لاصرت شاعر وطلبوهاعزيزين=لابد مايصير للشعر سايل
واخر نهايات الوناسه بلالفين=من عقبها والنفس مامن صمايل
وحتى اكثر الطلعات ماعدها شين=شفت الشعاف وعفتها والمسايل
لاعاد به صيدن ولانا بشفقين=مغير طرد الحمرة بالقوايل
وحتى المروبع فاقدينه له اسنين=يزها الفياض اللي نفلها خمايل
تنفعني النشدة اليا قلت غادين=نشدة ولالي من ورها تحايل
يوم اننا مع كل وادي محيلين=تنزل وكل يستبق بالنزايل
ويوم ان جار البيت يسار ويمين=وشفت البكار وزملها والجلايل
والشعر مالها ذايقه يالشريفين=بس الهياط وشحذة عند قايل
كنه يقود المعركة يوم حطين=حلقة تقطع بين صايل وجايل
يبي يدور من قصيدة ريالين=وراع الفلوس مرهمن له خصايل
شيخ ولد شيخ على شان خمسين=لو كان مايسوى من الضان حايل
وحشا ماقول الوقت مابه سلاطين= لكن ارجال العرف صاروا قلايل
ياليل ماحببك غير المصلين =الياانتصفت وقام راع النفايل
وسجد لوجه الله اليا راح ثلثين=خوف ورجاء من يوم فيه النكايل
وانا دخيلك يوم رجح الموازين=تغفر ذنوب تكتسيني ثقايل
يالله تقبل توبتي قول امين=من قبل لاتوضع علي النثايل
=غازي بن رويعي الوهبي