يازين ياللي عذب القلب طرياك=يأغلا وأعز إنسان شفت بحياتي
ليتك تجي وتشوف حالي بلياك=عقبك ضلوع القلب صارت حتاتي
اسرح مع الهاجوس يازين والقاك=واحاول ادني مبسمك من شفاتي
احس لحظتها بدفوة شفاياك=واذوق طعمن تقل سكر نباتي
لكن ليامني تذكرت جفواك=ابكي واهل الدمع والهم ياتي
مالوم عيني لوبكت بعد فرقاك=مالوم عقلن في غيابك شتاتي
حتى يميني من جفت كف يمناك=مالومها لو سطرت لك وصاتي
يازين أحبك حيل واغليك واهواك=يادنيتي ياغايتي يامناتي
مهما يطول العمر عايش بذكراك=نذرن علي مانساك لين المماتي
وإن كان قلبي فكر بيوم ينساك=يالله عسا ربي يعجل وفاتي
لو كان لي قدرة بنسيان ذكراك=ماشفتني دايم اشك بصلاتي