سـلام منـي عـد وبل المخيلـة=وأعداد ما هل الحيـا في سهلها
وأعداد غيثٍ هل في أرضٍ محيلـة=وأحيا المدر والشيح وأحيا نخلها
من هاجـسٍ يسـري بليـا دليلـة=ويترك بيـوتٍ ما تجمل لأهلها
لاسـج ما يركب ذلـولٍ هزيلـة=ولايعسف الا خيل ما أحدٍ عدلها
وليـا تقـدم بالبيـوت الجـزيلـة=يمد من جزل الجـزايل جزلها
وإن قالها من فوق رأس الطـويلـة=في ليلـةٍ رب البريـة نزلهـا
أبـو محمـد دام ذخـر القبيلــة=من بعد رأس العود يبقى أملها
ماهي في حـق القـرم والله قليلـة=وعند العرب ما كل رجلٍ حملها
وقت اللـوازم والحمـول الثقيلـة=مايبـرك الا للحمولـة جملهـا
يوم العميـل أقفى وخلَّـى عميلـة=عقَّالهـا ذبت عن اللـي جهلهـا
ربعي هل الطالات وأهـل الجميلة=معروفهـم كل القرايب شملهـا
ميقافهـم أشفـى القلوب العليلـة=يوم المـواقف قرِّبت من جللهـا
الحـر حملـه لاثنـى يرتكـي له=وإن جات من جاهل يعدي زللها
وكلٍ على ما قيـل يلقـى حصيلة=إليا تخالـط جـدها مع هزلهـا
ومن شان بعض الناس مافيه حيلة =أقوالهـا ما تنعـرف من عملها
وقفت ميقـافي في ليلـة فضيلـة=وحسبي من الأمثـال طيِّب مثلها