صدمه وصابت كنها رمي بلجيك= جتني على غفله بلا سابق انذار
مسكين ياقلبي زمانك معنيك= صدقت من قالوا على الوقت غدار
ياوقت ياغدار مالي رجا فيك= اسقيت زرع الصبر مابان بثمار
والحال يامضحي لها عام تبكيك= ضايق علي الكون مع ضيقت الدار
عن حالتي لابد الاجواد تنبيك= صار السلا عندي تفكر وتذكار
يالصاحب اللي لادعي قال لبيك= افزع لقلب ٍ يحرقه واهج النار
ارسله العدوان فيروس تفكيك= خلا علاقات المحبين تنهار
وضعه من الوجدان ماضن يرضيك= سيطر عليه الحزن غارات وحصار
والعاذل المغبون من عيشتي ذيك= اليوم يضحك شامت بكل ماصار
عسى حياتك ياعضيدي تهنيك= وتعيش فالدنيا بلا ضيق واعسار
والحاسد اللي بالمضرات ينويك= يلقى غبينه وين ماوجهه وسار
هذا جوابٍ جاك من شخص ناصيك= وارضي فؤاد اللي عليه الزمن جار
لجلي اعدك شيك مافيه تشكيك= نصرفه باليورو ثلاثين مليار

الله ياخالد يحفظك ويحميك=والله يجيرك من بلا سوء الاخطار
والله على صدمات بقعاء يقويك= والله يهي لك عن الباس معبار
اعرف تراء لك واحدٍ مايخليك=علام ماتخفي عباده من اسرار
ان مانوالك بالعطا ماحد معطيك=لو افزعو لك فزعة الوالد البار
اللي لايمنك زبنته ينجيك=اخير من فزعات عامر وعمار
اللي كتب فاللوح ماهو بمخطيك=سبحان من بيده تصاريف الاقدار
الرزق لوهو في يدين الصاعليك=انكان دب الجوع في كل الاقطار
ياخالد ابن عبيد ماني مخليك=من لافزع جعله لقصاف الاعمار
ماتملك اليمنا فدايا مواطيك=للكسر جهزنا جباره وجبار
ماكل صاحب لو ضحك لك مصافيك= مال المروه غير وافين الاشبار
اخذر مشربك صاحبه فالشرابيك=حرم على رجلك تمره بمسيار
لاهنت ياخالد ولاهان غاليك=جعلت عزالنفس لك تاج وشعار
دنيا العناء ماهي تغير مباديك=مدام تملك بعد نظره وصبار