فوازالزويهري والبحار=
سلام فيه اللحن راقي=مادام في محضره أرباب
يجري كما جاري الساقي=يروي زلاله صفا الأحباب
بيان الصمت وأبو فرح=
من قاصي القلب واعماقي=ترحيب ماينحصر بحساب
بحضوركم هاضت أشواقي=وزين المثل مع لقاكم طاب
فوازالزويهري والبحار=
عسا البقا يشرق اشراقي=للي معانا يخط كتاب
لي قلب دايم وهو شاقي=شاقي على شوفة الأحباب
بيان الصمت وأبو فرح=
دام الهوا بينكم ناقي=لازمك تبحث عن الأسباب
وش يمنع الرجل تنساقي=لقلوب فيها الرجا ما خاب
فوازالزويهري والبحار=
لو كان صفو الهوى باقي=ما جيت أشكي ألم منصاب
ما عنكم اليوم مدراقي=يا كم وقفنا على الأبواب
بيان الصمت وأبو فرح=
ابحث وفتش فالأوراقي=من قبل تبدي وله وعتاب
لا تدخل النفس فأطواقي=قدام تسمع عذر من غاب
فوازالزويهري والبحار=
الجرح فالقلب حراقي=وانا انتظر له على مرقاب
وللآن ما شفت براقي=يا كم رسلنا أهل واغراب
بيان الصمت وأبو فرح=
تعميمنا جاك والحاقي=مخصوص من مجلس النواب
هذا السبب منك منساقي=حطيت ما بينكم أجناب
خلك على الخير سباقي=والطيب راعيه ما يرتاب
لاهل الوفا درب متلاقي=باسباب مثل العسل تنساب