علّيت صرح الموده فـوق=ِخلْتك حيا محتـري برقـه
وطشّيتني في متاهة شوق=يذرف بها الطرف من حُرقه

من اوّلي التمـس اعـذار=واكتم عنا خافقي الحايـر
واليوم قلبي صِويب وصار=ما يحتمل هجرك الجايـر

أشوف في عالم العشاق=كلن تعاطف مع الثانـي
وتصيبني حيرة المشتاق=كل ما تذكرت حرمانـي

أشتاق له والسنين تمـر=لو اخسر العمر ما بعتـه
وصب الأسى والفراق المر=في كاسيَ اللي تجرّعتـه

ضاع الأمل وانتظاري طال=ما بين صبري ومحاذيرك
والقلب سويت له اقفـال=ما اظن يستوطنه غيـرك

حذّرتك الهجـر مـن أوّل=ما طعتني ، رحت وتماديت
ما هي غريبه لو اتحـوّل=قلبي وسبت الهوى واقفيت

لا شفت لك آدمي طاووس=من الكبر منتفش ريشـه
إحذر ترا صاحبَك ملموس=والمفترَض منك تطنيشـه

صابر وحكمه علـيّ جايـر=بجروح جرّت علـيّ الويـل
تنتابنـي رعشـة الحايـر=وقت السّحر معْ طلوع سهيل