سألتها وش غيبك قالت ظروف =
وعيونها قالت ترا السر خافي =
قلت اصدقي واعملي في معروف =
العذر هذا عذر ماهو بكافي =
إنتِ تغيرتي بعيني وأنا اشوف =
بيني وبينك صار فيه اختلافي =
انتِ بدا حبي يسبب لك الخوف =
وأنا برغم الخوف مازلت وافي =
الحب لو دربه بالاخطار محفوف =
راعيه يمشي له على الشوك حافي =
والحب ماهو زخرفة هرج واحروف =
احساس ماتلحق مداه القوافي =
فيه الفرح والحزن والشوق مالوف =
ان كان نابع من نهر قلب صافي =
يعني خلاص اروح وانساك يا نوف =
في جرح مايبرا ولا له مشافي =
ولا استمر بحبل الامال مكتوف =
وارجي رجوعك عقب طول التجافي =
واقول شمس وحال من دونها كسوف =
ولابد مايشرق ضيا نور طافي =
وارجع اقول ظروف قلتي لي ظروف =
اشكي ترا مابيننا سر خافي =