احذر يانايف كان تطغى على الناس= ترى الضرر طبعه يجر الضراير
وراع الخطا لو عاش محمي من الباس= لابدها ضده تدور الدواير
والله رقيبك يوم الاقراب نعاس=والله يعلم ماتكن الضماير
والحسد عادة شخص واشي وبلاس= يحرق صدور الناس حرق السجاير
والغدر للخوان حيله ونوماس= هذاك في صدره لهيب السعاير
لولاه مايسطي على كليب جساس=ويجبر عيون القوم تذرف عباير
والطيب خصله ماتثمن بالالماس= ابليس منها ياابن الاجواد غاير
وطبع العفو والجود مع رقة احساس= ماتجتمع في قلب قاسي وجاير
ومن اتكل بخلاص مايعرف الياس= واللي انكتب فاللوح صاير وصاير
واحذر يانايف كان تطغى على الناس=واعمل ليوم ٍ فيه تبلى السراير