الشعـر ديـوان العـرب والقبـايـل=في وقتنا الحاضر وفي ماض الازمـان
تاريـخٍ ومرجـع لـكـل الفعـايـل=نلقى به اعلـومٍ جزيـلات واسمـان
تراثنـا الـلـي ورثــوه الاوايــل=(ا) لمن خلف من بعدهم خير برهـان
يـزود قـدره عنـد راع الاصـايـل=وبارض الجزيره للمناعير لـه شـان
في مامضى علـى ظهـور الرحايـل=تنقـل علومـه مـن بـلادٍ لبـلـدان
بالسلـم لـه قايـل وبالحـرب قايـل=وتوجد به احـداثٍ وسيـره وميـدان
نخوه وفزعـه لا غـدا الدهـر مايـل=وخيره وطيب اليا اعتدل كـل ميـزان
موفي بكيلـه فـي جميـع المسايـل=وله ابوسط اصـدور الاجـواد ديـوان
ارسى من اطويق ومن اجبـال حايـل=ومكانته فـي زود ماهيـب بنقصـان
امحشم ومحفـوظ عـن كـل عايـل=ماكنـه الا شيـخ لابـه وسلـطـان
واليوم مـدري يابشـر كيـف قايـل =اصبح بضاعه في طـرف كـل دكـان
يشرونـه التجـار واهـل الخمـايـل =اللي تحسب الشعـر ينبـاع باثمـان
حطـو برامـج والمكاسـب رسايـل=تستنزف اجيـوب الجماهيـر باتقـان
بدعـه وخدعـه ياعيـال الحمـايـل= القصد جمع المـال والشعـر عنـوان
ليـن اقدحـو بالزنـد روس الفتايـل=وهبت وشبـت عنصريـه بالاوطـان
وشعر الحداثه كـذب ماهـوب طايـل=هرجٍ بـلا معنـى وراعيـه غلطـان
اقـول قـولـي واثبـتـه بالـدلايـل=((وماقل دل وزبدة الهـرج نيشـان))
فرايـد الاشعـار واهــل المثـايـل=تمضحلت واللـي نبـي كـان ماكـان
وجهة نظـر بالشعـر والشـك زايـل =واستثني اهل العرف والميز والشان
اللـي قصايدهـم سـوات المخـايـل=تروي وتنعش ذايقـة كـل عطشـان
تعـددت تـال الـزمـان الوسـايـل=مار اختفى المضمون في بعض الاحيان
والشعـر لـه مثـل الاوادم سـلايـل=والفرق بين اليـوم والامـس شتـان