طلبت مني نصح واقول لك جاك= بعطيك من حلو المعاني إفاده
احرص على اللي لجله الرب سواك= حافظ على دينك وشيد عماده
وقيامتك حضرلها وقت دنياك= واندم على ساعه بغير العباده
واعمل لموقف فيه تشهدلك اعضاك= في يوم ماتنفعك فيه الجلاده
وبالطيب جازي شخص خلف ورباك= حبك طغى في حب شربه وزاده
والمعصيه سجن ٍ من الهم منجاك= ايموت راعيها وينبض فؤاده
واللي انكتب لك امر محتوم يلقاك= ومافات مايمديك فيه الاعاده
وكل ماحولك مصيره للاهلاك= والنار تاليها بياض الرماده
ولاتشتكي لاشفت وقتك تحداك= لاواهني من ياخذ الحمد عاده
ودمح خطا المخطي على قد ماجاك= وارفع على الجاهل سيوف الركاده
وبالورد جازي من يقدم لك اشواك= تلقا من الرحمن شكر واشاده
والحسد شوفه سقم بالحيل فتاك= ماتعمله من خير ياكل حصاده
والجود طبع ٍ لايفارق مزاياك= لن العرب نالوا عليه السياده
واحرص على الجيره ترى الجار فحماك= ولاتجيك من يم التطور بلاده
وقطع القرايب عار تفرح به اعداك= من وين ماوجهت تلقا نقاده
وترى الخطا مرجوع لو كثروا احماك= والحق لابده يحصل مراده
واهجر دروب العشق حذراك حذراك= والقب حارب رغبته في وداده
وخاوي اللي في صلاحه تعداك= الصاحب اللي ذكرك بالشهاده
واحذر تخاوي كل نمام افاك= في صحبته تلقا عذاب وقراده
ولاتدعي علم ٍ به الجهل يكساك= لن الحداده صنعة اهل الحداده
والنصح ماعافه وسيع ٍ للادراك= فرعون وش حصل نتيجة عناده
والوقت لايغويك لاصار يهناك= يجيك صيفه بعد نسمة براده
والدين في بعده ترى تهون بلواك= لاتقربه لو كان تقوى سداده
ولا تسبق الاحداث وتكون شكاك= ليلك يجيه الصبح يجلي سواده
وعين الضعيف اللي من الضيم ينخاك= واعلن على المنّات حرب الاباده
وليا عملت الطيب كل عيب عداك= يرتاح راسك لرتكى للوساده
والختم صلي عد دورات الافلاك= على الذي جانا بنور وسعاده