يالله عسانـي دايـم موفـق خيـر=يوم ان كـل يلتفـت وش حصيلـه
جهدي علي والله عليـه التياسيـر=وأنـا حريـص بمدتـي للجزيـلـة
لوانهـا تتعـب ركـاب المداوريـر=يبونـهـا والله علـيـه العقيـلـه
والوقت مابيـن ابتسامـة وتكشيـر=دوام حالـه حاجـة ن مستحيـلـه
مابين حلـو ومـر تجـي المقاديـر=والعبـد مالـه بالمقاديـر حيـلـه
ماله ياكود الصبر ويواكـب السيـر=وان طاب حظه كلهـا تستـوي لـه
لوكان مايقدر علـى حمـل قطميـر=شـال الوساقـة والعـدول الثقيلـه
وان صار حظـه باللـوزام معيثيـر=أدنـاة فـي ممشـاه ماهـد حيلـه
يالله تقدينـا علـى هـداك ونسيـر=وانـك تجنبـنـا دروب الرذيـلـه
لاصـار مانسعـى لجمـع الدنانيـر=في كثـر مسعانـا لكسـب الجميلـة
وعيب على الشاعر وضعف وتقصير=لاصـار فعلـه مايطـابـق لقيـلـه
وأنا احمد الله يوم حصلـت تقديـر=الطيبيـن اهـل النقـاء والفضيلـه
من فضل علام الخفـا رازق الطيـر=اللـي اعبـاده بالكـرب تلتجيـلـه
لي مجلس بين الرجـال المشاهيـر=وحضرت ضمـن ممثليـن القبيلـة
في ملتقاً للشعر يفرق عـن الغيـر=لنـه بإسـم شخـص قليـل مثيلـه
امير بالمنسب وفـي شعـره اميـر=محمـد الأحمـد مـزبـن دخيـلـه
جينا نحمل المسـك ماننفـخ الكيـر=بالجزل نوفـي باغـي الكيـل كيلـه
الشعر فـن وذوق دقـة وتصويـر=الغـث واجـد والـنـوادر قليـلـه
اللـي ليامنـه قصـد قـال بأطيـر=يطيـر ويوقـع ولانــي عميـلـه
عقلي معي وأرضي شفوف الجماهير=وكل ن علـى ماقيـل عقلـه دليلـه
لاجيت لي قفـر قطفـت النواويـر=وأهديتهن لأهل الشفـوف الأصيلـه
في مـدح والا باجتماعـي وتذكيـر=قريحتـي ماهـي علـيـه بخيـلـه
وشعر الغزل تحلـو فيـه التعابيـر=أميل لـه لاشـك مـن دون ميلـه
محبـة الوضحـاء وحـب الغناديـر=علاج قلـب وطـب نفـس عليلـه
كد قالها بن عون مع شاعر مطيـر=بيت ن توافق درب سيلـي وسيلـه
أستانس ليا اودهت لنياقـي عصيـر=قبالهـن هـم الشـقـاوي يزيـلـه
ادلـه وادلَـه خاطـري يامناعيـر=ولا الهمـوم المرمسـات المهيـلـه
يردن كما ورد الضوامي على البيـر=وقـول للـي كـل بـرقٍ يخيـلـه
ياللي تجر الصوت لشعـوري تثيـ=رزميـل درب وكلنـا مـن فصيـلـه
تسري على همك وانا بهمي اسيـر=والوقت كـم فـرق خليـل وخليلـه
عشقت عفرا بنـت مقـدم طوابيـر=وأرمس غلاها بالضلـوع النحيلـه
والله حق انه حصل بعـض تأخيـر=أبهـرج والشايـب اعلـن رحيلـه
وعيني لهم عيني لهـم والمظاهيـر=بين الشعاف وبين طعـس ونثيلـه
وأنكفت لاشايـر ولاسامـع مشيـر=من النهر مجـزي وعفـت الثميلـه
وجدي عليها وجد راعـي مغاتيـر=أتـلاد ماهـي كسـب يـوم وليلـه
ربع بها مربـاع ماهـو مخيضيـر=تشبع ضحى لا جندبت فـي خميلـه
ماغير يشرب من حليب المصاغيـر=ولو يتهقـوى فـي فحلهـا يشيلـه
وعلى ربع يـارد لمانـن شخاتيـر=بعيـد لكـن ويـن يلـقـا بديـلـه
طق اللبيـد اللـي لـذوده تباشيـر=وملـت مناحرهـا بنـود عليـلـه
ثم كل ماهوبل لهـا بصوتـه تغيـر=لاماوصل كن السهـل ينطـوي لـه
شربن وروين لين همـن مصاديـر=وأوكى القـرب لرقبتـه الله وكيلـه
ويوم اعطفن ودرت احدى الأباكيـر=شـارك ولدهـا وزودهـا صميلـه
وصدر من الماء واسبروه السبابيـر=وسبقهم اللي فـوق بنـت الكحيلـه
ثم جاه نطح وساومه تقبـل آسيـر=والا تزارقـك السيـوف الصقيلـه
عيـا يطيـع ولابهـا زود تفكـيـر=ممـات عــز ولاحـيـاة ذليـلـه
أفتنهم وثـارت سـواة المعاصيـر=كثروا عليه ولاعـرف مـن قبيلـه
حالي مثـل حالـه بكـل التقاريـر=مالـه جـدى الا ونتـه واتهليـلـه
مثـال سطرتـه بلأبيـات تسطيـر=مـار اثمرتهـا ومالكـم بالطويلـه
لوقيـل شفـك فـي نيـاق مغاتيـر=والا يابـن ناحـل فتـاة ن جميلـه
قلت اصبروا لين أتزوج على خيـر=وأخبركم أغلى الـذود والا الحليلـه