يالآدمي غرك بوقتك تهقويك = تحسب الحياه ادوم سلم واماني
لا والذي قالوله الناس لبيك= وصاموله الوقفه وشهر ارمضاني
لو طولت لك بالفرح ماتهنيك= تدرج رحاها بختلاف الاماني
بدورة ٍ تطحن سنابل امانيك= من اعلى قممها تطرحك للمثاني
الوقت غادر صحبته ماتسليك= مثل الصديق الشين واردى كماني
والصحبه الشينه حذاري تخاويك= واحذر من الصاحب ليا صار داني
كم من صديق ٍ ماتسره عوافيك= يزرع لك الغامه عيان وبياني
واتكل بالله على من يعاديك= ومن اتكل بالله ماهو مهاني
والحقد قاتل والشماته تحافيك= وترى الجهل محسوب ضمن الجناني
واصبر ولو كثرت بوقتك بلاويك= والصبر شيمة جيدين الايماني
عواقبه تنصف ولابد ترضيك= لو طولت لازم تزف التهاني
ومافات فات ولا تحسر لماضيك= وماتملكه مفقود والعمر فاني
ولاتعيش بالغفله بغفلتك ياتيك= من يسرق الارواح سبق الثواني
والموعضه خير ٍ من النار ينجيك= والله يرزقنا فسيح الجناني
واصغي لمن ياعضك ذهنك واذانيك=وادرك امورك قبل فوت الاواني
كتبت لك يالادمي ماينبيك= في منتدى ضم العلوم السماني