المشاركة الأصلية كتبت بواسطة علي هليل الحربي

جتني هديه من خيار الهداوي=هدية الشهم الوفي طيَب الصيت
لاهنت يامن لقبوك الهواوي=هواوي العلم النزيه وتسميت
معروف بالثنتين شاعر وراوي=واليا رويت تثبت العلم تثبيت
ومن الرجوله فاصلٍ لك كساوي=على الشرف والعلم الأبيض تربيت
هديتك حطيتها بالعلاوي=حطيتها باعلى مكانٍ من البيت
تستاهل الحفوه وفبها حفاوي=من عند ابو مشعل وفيها تحفويت
ياعلي خاوتني وانا لها مخاوي=واشوفها قدمي ليا اصبحت وامسيت
سحابةٍ غاثت شعيبٍ سناوي=كلٍ يقول من السحابه ترويت
ياكثر ما بالسوق سارح وضاوي=ياقل ما يرضيك كانك تنقيت
وليا سالت ابشر بكثر الفتاوي=فب وقتنا كلٍ يبي كلمة افتيت
وانا فخور بما حوته المطاوي=نوادرٍ ياعلي فيها استدليت
الي مضاربهن مضارب نداوي=يفخر بهن حيٍ قراهن بعد ميت
من لاوعنه ما يطيح متنساوي=يصبح وجمعه يابيض الوجه تشتيت
حطٍ على كبد المعادي مكاوي=ياما لصداهن بالمجالس توحيت
خلنه اطوع من قعود اللحاوي=هذا الصحيح وللسوالف تثابيت
والي غبني يابعيد الهقاوي=ناسٍ تلوث صافي السمن بالزيت
وسرحان من كسبه تعشى الضراوي=عوجا يابومشعل كبر ضلع حليت
طمس الحقايق من كبار البلاوي=يالي من الواقع جزعت وتبريت
وش لون بشت الشيخ تعطى لشاوي=ياموقتين الوقت من دون توقيت
هذا وانا بالي خلقني رجاوي=ولغير خلاق البشر ما ترجيت

حي الجواب الي له القلب هاوي=اعداد ما هب الهوى فيه هليت
هيَض خفوقٍ به عنى الوقت داوي=روضٍ زماليقه وسوم المنابيت
مثايلٍ من شاعرٍ ما يراوي=يمدح بهن حيٍ ويرثي بهن ميت
وان قيل منهو قلت رجلٍ غناوي=رمز الرجوله والشعر فيه غنيت
غنيت بالي مكسره عود جاوي= والمدح بابن عبيد يجزل لي البيت
بالطيب والمعروف حبله رهاوي=يقول لو ما قلت غالي ورديت
لو ان لمجاراه مانيب قاوي=عن واجب الثنتين قمت وتفانيت
الاوله عن حقها مانت غاوي=والثانيه من ثقلها هزت كميت
والقيل يابن عبيد بخس وغلاوي=شيٍ عليه العلم وشيٍ تفاويت
ولاَ النداوي كل قوله شفاوي=في حكمته وسهوم ضيه تقديت
له منزلٍ بين الكواكب سماوي=وله ماقفٍ يصعب على كل زنتيت
صفحة شرف ما هي مجرد دعاوي=وثَق بها صيتٍ وحطم بها صيت
حط الحقايق في ثغور الاهاوي=وصب القذايف فوق روس الطواغيت
ولاَ غشيش القلب ماله مداوي= الاَ مع الي عن مجالسهن اقفيت
والي لبيت الله على الحج ناوي=لابد له من وقفةٍ بالمواقيت
لو كل قلبٍ يابوفارس نقاوي=ماصار بالدنيا عفون وشماميت
بعض الحقايق يابعيد الحراوي=امر وادهى من فضيحة(وترجيت)
مادام راع البشت خلاَ الكراوي=مالي ومال مفتحين التوابيت
خل الحساني يدمحن المساوي=يالي مع اهل العرف قلت وترهيت
مااقولها خايف ولاني عماوي=لكن حسب عرفي هو الي توريت
هذا وانا مديون لك بالطراوي=دينٍ يوفيه الولد كان ما او فيت