مريت سوق الهوى عابر = قلت اشرح القلب وآسليه
حصّلت سوق الهوى جاير = من مر في داخله يبكيه
ملزوم يمشي مع الساير = اللي عليه الهوى يمليه
واليوم قلبي بهم طاير = ياكيف يرجع عن اهل التيه
أعوام مع الفلك داير=وتصابح الدار وتماسيه
ولا شفت من يجبر الخاطر=أو يرحم القلب ويهنيه
وللآن وأنت كذا صابر= في وقت ماينعرف تاليه
خاطر معه كان بيخاطر=وإن كان عيَّا تعوَّض فيه
سوق الهوى رابحه خاسر=ونوع البضاعة سبب مافيه
يطرب لها السمع والناظر=قدام لا يتضح خافيه
لا تسلم القلب للتاجر=وسايس أموره بما يرضيه
واشرح له الوضع بالحاضر=يقنع بصفواً تربى فيه
دمعي من الخد متناثر = بأسباب من شفتهم وابغيه
عنيد مثل الحجر كاسر = قلبه على اللي بدا يبكيه
ظلمه على اهل الهوى داير = يمشي مابين الاوادم بيه
لاوين بأبقى معه حاير = ويهنا بها القلب وتسليه
خذها إفادة على الطاير=زود الترجي ترى يطغيه
وخلك على خطك مساير=واللين عن مسلكه يثنيه
واثبت على اسبابك وثابر=وازرع غصن للرجا واسقيه
وان كان ظلى كذا مكابر=من خالف الدرب لا ترجيه