لوا خسارت جيبكم ياهل الجيب=بضاعتن جلبت على غير سوقي
يدور بالشارع بليا مواجيب=أشهب جديدن حوض شوفه يشوقي
كنه عسف موميات العياسيب=ظامر عسيف مسلسلات العموقي
وليا شلع مع نابيات الجراهيب=صاروخ عصرن بعد الأمزان فوقي
قدام عجه نافذات المشاهيب=بينه وبينه بعد فز المروقي
وبرضه نزول مصخرات المهاريب=ولا معذوف الملح سار الفشوقي
يصنع هوى لو يركدن الهباهيب=وليا طوى للبعد عرضه يضوقي
جمر الهوى في نابيات المراقيب=يوصف على أصطبه سريع اللحوقي
يجوز للصحرى بعيد المطاليب=ليا عارضنه شامخات العروقي
أليا سنم الحمرور ذار اللواهيب=وردف عليه من السوافي أشنوقي
في خد صحرى مابها الحي ومريب=مافيه غير مكونات الطروقي
مايطلعنه ناشبات الأداعيب=اللي مع الشارع تجوز وتلوقي
ذا واجبن لمقرب البعد تقريب=أليا ضحا سرحه بعيده أشلوقي
جيبن بعيده مثل حبل المجاذيب=وليا طلع مثل أنحداره سبوقي
يطلع أقطوعن مع طريقن أليا هيب=عسرن يبي ساعات ماله دنوقي
وليا سرى مع نايمات الأشاعيب=برضن عليها من قمرها البهوقي
متقبلن ساد الخيال المكاهيب=أليا نطح لمشبرقات البروقي
في ديرتن يسرح بها عصره الذيب=ورجع ضحى بكره وسيع الشدوقي
من قل مايلقا قريب المعازيب=خليان مافيها يدوج مخلوقي
مودي اللي حيرنه نواشيب=عليه من حرن يتل السبوقي
يبي الفضا اللي فيه سوى تجاريب=واليوم عوق الساق فيه مخنوقي
المولع النشبان مثل المقاضيب=كنه قضيب الطير عند الريوقي
لا صار تحكمبه أضروفن مغاليب=وقلبه على شوفت محبه شفوقي
أليا سقنه مبعداته مشاريب=من بعد وضروفن ترد وتعوقي
من ست صيفه مامشنبه مغاريب=ولا وجهنبه يم شبل الرموقي
ذيب الغداري ليل عج ولحاطيب=الساري اللي مايسمى سروقي
يبي السفر لاشك عنده ولا ريب=يطرد هوى نفسن وقلبن يتوقي
يبي ديارن عصرها عنده أتغيب=من بعدها بقلبه تلاقا الفتوقي
مقرب بعيده عند موف المواجيب=يجلى عن المحروق ضر الحروقي
لاكن نهار اليوم كورة لواعيب=يدور الشوارع بيد كل مخفوقي
اللي على راسه نقل صورة العيب=من نص راسه للعلاب محلوقي
بلوى على مودي غريبه عواقيب=لو فيه نفسن مات موتن زهوقي
ويجوز قدم ألحي حرش العراقيب=في مهمهن من خاليات الفتوقي
هذي حلات الجيب من صح ومصيب=ماهو عليه مشوهين الخلوقي
لاهم رجال ولا بناتن رعابيب=ياسود تعشيهم ويرمال ذوقي