صياف:=
شليويح المطيري شرب من شربة الذيب=وسافر في طريقه وخلاني لحالي
طوى حبل السواني على حرش العراقيب=ولا أدري متجه لليمن والا شمالي
شليويح=
أنا ماني بصيده لعكفان المخاليب=اعرفك يالشهر قبل لايبدي الهلالي
زمان العام شفناك كفيت المحاليب=كرامه لابو عنتر.. وابو زيد الهلالي
صياف=
طلعت من اسفل الضلع في روس المراقيب=وحول بك نصيبك على مرقاب خالي
أنا صفيتها يوم خبثن المشاريب=لكن انته تطش العمامه والعقالي
شليويح=
اساير بعض الامه مابين الخبث والطيب=لكن أنته مع العدل يوم العدل مالي
ياكثر اصحابنا يوم جربت الاصاحيب=لكن الساس مبني على الجرف الهيالي
صياف=
هبوبٍ شالت البيت مركوز الاطانيب=بعد كره تشيل الدقاق مع الجلالي
وصلت البحر الاحمر.. وحنيت المشاعيب=وبكره يصفي الماء لرعيان الحلالي
شليويح=
أنا حقي على اللي يعرفون المواجيب=ولا يعرف لزوم الرجال الا الرجالي
شربنا الجم الازرق وخلانا المغاريب=وأنا ماضاع لي صرف قرش ولاريالي
صياف=
ركبنا بالسفينه وسوينا تجاريب=سحابٍ طاح ماله لابرق ولا خيالي
وياكثر المشاكل.. وياكثر العذاريب=ولن ذقناك ياشري مر والاانت حالي