ياذيب جر الصوت في سيح الجبل وإلا ارقـبه=وانا علي اجاوبك ياذيب في جر اللحون
لاشفت زولك ليلة اربع طعش صــوتــك تقـنـبـه=كنك عقيد يوجه الفرّيس قدام يغزون
لـــــو يتـعـزوا يـمـك الرجــال ويـمـس شـنـبـه=أشهد شهادة حق ياذبحك بعيني مايهون
والله لطالب دون راســك كـن لي ثـــار رقـبـه=عهداً علي ان مت ياسرحان ماتموت مغبون
انا اعـتـبرك انــت الخوّي اللي صحيبك تعجبه=وانت اعتبرني صاحباً غالي على مثلك يمون
انـتـــه وانا حـتـى العـــدو حـوالنا ماتـطـربـه= والقاسم اللي مشترك من بيننا نزف الطعون
يوم الردي يـبـرك بــحـمـلـه ويتساند بـركـبـه=ماللحمول الكايده كود المناكب والمتون
وانا أحتمل مـثـل الجـمـل يـوم الضعيّف يتعبه=واسري مساريك البعيده والضعافى يمرحون
خطو الردي ســود الليال سيوفها ماتـضـربـه=يروغ عنها وإلأ انا وانته من اللي يثبتون
انت الشجيع اللي صواديف الـــزمــن ماترهبه=وانت العزوم اللي تصل لاضعاف مالآ ياصون
لاجـيـت سـاري دربـــك المعروف محداً يقـربه=من دونه اللاش يهبى وحثالة اللاش يهبون
في عينك اليمنى الفداء والتضحيه والتجـربه=وفي عينك اليسرى شرارة غيض من حشر الجنون
ياذيب قدرك في خفوقي حطه المولى هـبـه=ماتـغــيره سود الليالي بالزمن مهما يكــون