سلام دوبه طرا دوبه=جديد ماهو من الأرشيف
للصاحب اللي من اسلوبه=يغنيك اسمه عن التعريف
حيّاك والقيل ماتشوبه=آفه ولايقبل التزييف
له نكهةٍ معك وعذوبه=وآنا ترا يزيدني تشريف
وافي وصحبتك محسوبه=محطوط في قمّة التصنيف
منّي لك حروف مكتوبه=في رسمها مايجي تحريف
المعرفه دوم مطلوبه=برجال ماتعرف التخريف
ومثلك وشروك يشروبه=طيب وأدب في زمان مخيف
روحي مع الود مغلوبه=يمضي عليها الشتا والصيف
والمرء من دون محبوبه=بالله قلّي حياته كيف
سنّه علينا ومكتوبه=وتعوقنا مثل حد السيف
جوّد على الصبر ودروبه=لاتقول مامرني ياحيف
قدّم لي الصبر مشروبه=سنين وآنا في بيته ضيف
عطني أمل باتّجه صوبه=وشرواك مايخطي التهديف
يامكثرالناس مغصوبه=تشرب كؤوس الصبر تكليف
كونه لأهل الهوى عقوبه=وولد الهوى كنه مليقيف
والود يسلك معك نوبه=ومرات كنه سحابة صيف
الصبر ينقذ بإعجوبه=اصبر تسامر ولو بالطيف