ياعز منهي عزوته بالضيـق حـرب=اليا اشتد حبل السيم فـوق المحالـه
يشهد لهم تاريخهم شرقهـا وغـرب=زحول الرجـال محصليـن الجمالـه
ترفع لهم البيضا على مفرق الـدرب=وينهـض علمهـم طيبيـن السلالـه
مكاين{ن} ترطن بعـد{ن} وبالقـرب=تشغـل للـي مـع ورد والا لحالـه
وعن اللي وصل ديارهم يرتخي الكرب=اهل جنـوب المملكـه مـع شمالـه
وصبرو عن اللي هاجرو يمهم غـرب=لاما ضعيـف الوقـت ترتـد حالـه
ياليتهم جيران قرب{ن} علـى قـرب=اي و الـذي نـزل عليـه الرسالـه
وأودهم لوهـم ورا دولـة الصـرب=وخطـي يجيهـم بالمـزرف حوالـه
سلام{ن} احلى من لبن محمض العرب=والا ولادرير الخلـف بـاول هجالـه
وافطن ترا الدنيا مثل ماشي الـدرب=والا ضـلال اللـي سريـع زوالــه
وجميـع مابظاهـره تسربـه سـرب=ولا باقـي الا كـود جـلا جـلالـه

يالوايلي يارعي المنطـق الـذرب=ماهي خساره فيـك فعـل الجمالـه
يابن الرجال اللي ليا دندن الحـرب=حريبهـم يكسـر ويوخـذ حلالـه
جيابة البل قوس من مقلع السـرب=يـوم الجزيـره ماتعيـش بعدالـه
مابين سلب ونهب ومقطعـت درب=وعيال وائل فـي سنـام الرجالـه
والنعم فيكم والمثل نضربه ضـرب=الطيب بالطيب رصيـدٍ(ن) لحالـه
ولاهي غريبه فاعل الطيب من حرب=هـذي عوايدهـم رجـال الجزالـه
قصيرهم مايمتنـي غيرهـم قـرب=ويـروح مااوحـى مايكـدر ببالـه
وخويهم مهما يطـول بـه الـدرب=مايجلس الا فـي مكـان الشكالـه
شهد لهم بافعالهم راعـي الجـرب=قبلك ذكـر ماواجهـه حـي فالـه
وختامها ياراعي المنطـق الـذرب=شكري وعرفاني على غيـر أطالـه