يانومتي ليتك الليلة تعيديلي = حلم امس والديرة اللي كنت نازلها
حلمٍ فقدنا منِه بعض التفاصيلي = لكن غطّى على حلومي بكاملها
اذكر وانا راكبٍ بقوية الحيلي = طيارةٍ مع سمين المزن اميّلها
في جسمها مدةٍ دقيقة الذيلي = وتصارع الريح والجنحان تحملها
مروح وكل اموري بالتساهيلي = للديرة اللي مسيلٍ مسايلها
ومواعد القرم ابو عابد من الليلي = ومجهز العفش والعزبة مكملها
ونزلت طيارتي في جانب السيلي = عندي اللي يرتاح جاشي يوم اخايلها
وضحٍ غزايز كما نور القناديلي = من روسها للخفوف الزين شاملها
تشبه لوضح الطريسي منفي الحيلي = المرجلة بن سليم دوم طايلها
من صلب صاعد خوي السيف والخيلي = حربي ولن قلتها عليت بقايلها
قومٍ ظهر طيبها وس التحاليلي = وافعالها نايفة نادر حلايلها
وكل القبايل من زحول الرياجيلي = الها حقوقٍ وحنا ما انتجاهلها
والعبد ماتنفعة كود المحاصيلي = بالآخرة ياعسى المولى يسهلها