ياهاجس الأشعار وش لون ما أغليك=بيني وبينـك مـا تشيـن العلاقـه
عرفتنـي قبـل الشقـا والشرابيـك=مثل الثنين اللـي ربـوع ورفاقـه
يامـا فزعنـا بيـن ذولا وذوليـك=يـوم أن ولـد الاش يحتـك ساقـه
نحكم بها ما هـو بحكـم المماليـك=اللي يصـك البـاب ويفـك طاقـه
وياما سرينا مع صعاب المساليـك=ويامـا خذينـا حملهـا والوساقـه
لا صكـت الدنيـا علـي الشبابيـك=أخـذت فالسبـع البحـور أنطلاقـه
آخذ من الحاضر حضـاره تزاهيـك=وعندي من الماضي تراث وعراقـه
أمدح بك اللـي مايخيـب هقاويـك=كسّابت النامـوس لا جـات فاقـه
بالطيبـه ترقـا ويسمـو معاليـك=مثل الحصان اللي كسب في سباقـه
واطوع العاصي وأضـد الصعاليـك=أسوقهـم فالـدرب قدمـي سياقـه
وأعاتب الصاحب على قول يرضيـك=وأشره عليه أن جات فيه أنطراقـه
وأقدم أعذاري ليـا قـال وش فيـك=أن شاف مـا زّود عليـه أحتراقـه
وأناجي المحبوب باسمـه وأناديـك=تشهد على هـذا الغـلا وأشتياقـه
لا غاب عن عيني بجيبـك وأوديـك=مرسـول مابيـن الثنيـن بلباقـه
لو تنشري بالمال ندفـع ونشريـك=وش لون دام أنك مع الـروح باقـه
أفرح ليا جاني مع النـاس طاريـك=وأحزن ليا قالوا ضعيـف اللياقـه!!