رديح الفايدي ليلة الخميس 19/1/1425هـ
بمناسبة زفاف أخيه تركي وولده ماهر
وتقابل فيه صف ينبع البحر وصف أملج
شعراء صف أملج :
محمود عزازي ـ عبد الله باخت ـ عبد الرحمن الصيدلاني
أحمد الصيدلاني ـ محمد المرواني ـ أنس الدريني
شعراء صف يـنبع :
أحمد الدبيش ـ عايش الدميخي ـ ناصر الحجوري
شتيوي عبد الله ـ محمد راضي ـ محمد جميل الريفي ـ فيصل رباح


شعراء املج


شعراء ينبع







اللحن الأول ( ليحان )
أملج
من طيب خاطروروقـة بـال = جينا على حيـن ميعاده
سـلام للجمع منا يقال = نبغى الصفا يـزين من مادُه

يـنبع
لك في ديار الصفا مـنزال = وترحيب من كـل روّاده
ومعنى ساعات المصـافا طوال = والكـل يسعى لميراده

أملج
معروف دار الوفا لا زال = يستقبل الكل بوداده
نبغى معك طيب الأمثال = ونعيد له سابق أمجاده

ينبع
هذا وفا ما عليه اشكال= وطيب النبا منك معتاده
بحسن النوايا ما شي محال = والكـل يحصل على مـراده

أملج
رغم العنا مع ظروف الحال = ما همنا الصعب وابعاده
جينا لهم قاطعين أميال = لجـل الفرح يكمل اسعاده

ينبع
يا درب ساروا عليه رجال = واهل المواجيب تـرتاده
وانتا ما خابت بك الآمال = وتشريفكم للفرح زاده

أملج
على كـذا منطق العقال = اللي لهم شان وقـياده
أشكي لكم من ألم قـتال= من نـار فالقـلب وقـاده

ينبع
المرء تجري عليه أهوال = باوضاع بـلحيل لـهّـاده
ولا احكم على خافي الأحوال= ومن حولنا ناس نـقاده

أملج
المشتقي ناظره همال = سقيم جرح الزمن عاده
كل مالبخت سار في استقبال = ينكس مع الوقت وعناده

ينبع
باب السعو ما عليه أقفال = يبغى له جهود وإراده
حتى لو إنه مساره طال = المرء ما يقصر جهاده

أملج
أجهدت نفسي وسمت المال= وكررت جهدي ولا فاده
وين ألتقي للمساعي بدال = ويرتاح قلبي من انكاده

ينبع
خذ لك حكم ما عليه جدال = حتى الأمل يشعل زناده
لا بد ما يحلها الحلال = للرب تدبير في عباده

وانكسر اللحن


اللحن الثاني ( سلام )
ينبع
تأبى علي الليالي أرتاح = مثل العرب واهتني بالنوم
واستنزفتني صبر وكفاح = واللي ما يدري علي يلوم

أملج
مين الذي فالزمن مرتاح = ولا اشتكى من أسى وهموم
لكنه اللي عليك اجتاح = لجل ايش باقي معك لليوم

ينبع
لذيذ نومي عليا شاح = كني بهذا العنا ملزوم
كل ما الأمل في مجاله لاح = تحول دون الآمال غيوم

محمد مسلم وعايد الفايدي
إرداف
جينا سوى والقلوب صحاح = بسرور حول الجميع تحوم
اللي مضى من أسى ينزاح = لعل هذا الوفاق يدوم

أملج
اللي ما تجني وراه ارباح = ما انت على ملايمه موزوم
والناس بين الأسى وافراح = ما تسهر ألا بسبب معلوم

أملج
رد على المردوف
فيك الأدب منهجه ما راح = راع العقل قلدوه نجوم
واللي سمعته من الإفصاح = الناس حطت عليه ختوم

ينبع
القيل عن منهجه لا يزاح = خلك على واقع المنظوم
اللي بسده عليكم باح= جُل المآسي عليه تسوم

أملج
من منطقي جالكم إيضاح = ردي حسب طالع المزهوم
ما شفت ما ينعش الأرواح = هذا قراري حكم محسوم

وانكسر لحن سـلام


زهورات في كسرة لحن سلام

للشاعر الأديب
محمد صديق الحربي
( أبو واصل )

حسه على البعد ناداهـا= روحه وقلبه منه شفقان
البعد ما حقـق مناهـا= وهذاك شوقه على ليحان

صالح بركي
سجان قلبي قـفل بابه = صدر عليه الأمر ما يديـر
المدعي كيف يرضى به = ما دام يصغي لحكم الغير

آدم عطا
يا مسعد القلب لما يكون = عايش مع الأنس وانغـامه
يمضي عليه الدهر ويهـون = لو السهر طالت أيامه



حان أذان الفجر
حان أذان الفجر في هذه اللحظة ويا اصحابنا سامحونا
ولا ندري هل سيستمر اللعب بعد الصلاة أم لا
حيث أن الشاعر الهريويل وجماعته أصروا على استقبال
لحن ( زمانين ) فلم يوافق صف ينبع بناء على اتفاقهم المسبق
مع صاحب النوب ودرءا للمشاكل استحسنوا إنهاء اللعب واستأذنوا
داعين لأهل الفرح بالتوفيق والسعادة
ولكن لم يتوقف الرديح
فقد حل بديلا عنهم كل من
محمد مسلم الهريويل وعايد عبيدالله الفايدي وعبد الرحمن الفايدي




لحن زمانين

أملج
كل ما غفي ناظري حزات = أبغى الكرى يتخذ مجراه
استيقظه طيفه اللي فات = يبقى ما بين السهر وبكاه

ينبع
قلبي تأثر من الآهات = لما سمعت الذي غناه
أسعى معك وألقي النظرات = حتى نتوصل سبايب داه

أملج
دموع عيني دليل إثبات = غير الذي فالحشا مآواه
لجل أيش يخصني بالذات = ويكبني في سهر ما أقواه

ينبع
معلوم طرف الشقي ما يبات = لا طشه الشوق في معاناه
وكل الوسائل لها غايات = يسعى بها فالذي يبغاه

أملج
أكبر من الشوق والحرقات = فالنص واضح لكم معناه
أيام تمضي مع الساعات = وآنا مع الطرف في مداراه

ينبع
يا كم طرفا ذرف عبرات = لما رأى فالخيال مناه
وإن كان موجود فالساحات = الحي لنه اجتهد يلقاه

أملج
كل ما الأمل قربه خطوات = قلنا وصلنا إلى منهاه
تحول دون المنى عثرات = والمجتهد ما قصر مسعاه

ينبع
بذل المساعي مجاله آت = باللطف يا ما تجي منجاه
لأنه القلب له دقات = إدرى عليها من المآساه
ولولا الأمل ماانبنى بنيات = يبدا بها المرء في مبناه
الأمر مرهون بالأوقات = لا حانت تفوز بملاقاه

وانكسر اللحن


كسرات قيلت في كسر اللحن


محمد عوده
لأهل الوفا سجل الميقاف = اللي على الطيب ممشاها
سجل ناقي لهم ويضاف = يم الوفا تسارع خطاها

عواد أبو غندر
سمعت طير الغرام ينوح = بصوت عالي محادينا
مدري عنه يشتكي مجروح = وألا بصوته يشاجينا

محمد سعد الزايدي
يا مرحبا بالذي جونا = شعار وصفوف مكتملين
جيتولنا ما خذلتونا = أهل الصفا دايما وافين

محمد عوده
أمنت دمع الفرح ما يبوح = مبقيه في داخل جفوني
إلا نهار الفرح مسموح = تعبير صادق من شجوني

اللحن الأخير
مالك الروح
ينبع
موقف حرج حير الأفكار = لما القدم في مسيره مد
تعثرت والدليل احتار = واللي سبب فالمآسي صد

أملج
عن موقف الطيب لا تندار = موقفك فاللي حصل ينعد
يبقى ما بين العرب تذكار = والناس لأهل الوفا تشهد

ينبع
ملحق على ما سبق باشعار= لكل منهو فؤاده ود
لا تقصرون الجهد يا أحرار = مدوا لنا فالمساعي يد

أملج
حنا معك فالطريق السار= مهما حصل فالأمور وجد
نسعى معك لو بحور غزار = حتى تحصل على المقصد

ينبع
صار الذي فالخفايا صار= طال المدى ما لقوله حد
وآنا الذي كاتم الأسرار= يجوز ذاك الوفا ينضد

أملج
آخر مردود
ما يحجب الطيبين ستار = ودس الخفا ينعكس مرتد
على الذي يصنع الأضرار= بني الغشش لو علي ينهد
ومنا نصيحه لكم يا خيار = لا تواجهون العند بالعند
مهما سعوا فالخفايا أشرار = الطيب راعيه ما يجحد

وانتهى الرديح الساعة الثانية عشرة والربع
ويا أصحابنا سامحونا
والجدير بالذكر أن الشاعرين الشابين
عبد العزيز بنيه ، وحسين الشريف
قد وصلا صباحا وشاركا في اللعب كبحرية