هذه قصيده قديمه بعض الشيئ يعني لها أكثر من سنه
وقد جاراها أحد الشعراء لن أذكر إسمه حتى أحصل على قصيدته
بإذن الله تعالى

ياقلب ليلك ليل وعلومك علوم=خلك من اللي فات واحرص على الجاي
اللي مضى في كوم والجاي في كوم=والله عليم بما تكنه خفاياي
اجلس عيا واقوم واطيح واقوم=متمسكٍ في راي ومخالفٍ راي
رايٍ يقول انساه وابعد عن اللوم=ورايٍ يقول الله يحقق لي مناي
مابين ذاك وذاك ياقلب ملزوم=تصبر على الشدات لرضاه ورضاي
انا نخيتك وانت ياحر شغموم=دون الطويله لا تنوَخ مطاياي
دون الجبال الشم لا تكسر الحوم=لولا الجبال الشم ما صغت معناي
من ليلة الاول إلى مغرب اليوم=وانا هواجيسي تعدد كواياي
ياقوم ياقلب الغرابيل ياقوم=تبحث خفاي ولا تجوَد وصاياي
وانا وريث رجال وفعول وسلوم=ماني هزيلٍ يسعد عداك وعداي
ان جيتني محشوم وان رحت محشوم=يامن مزايا جوهرك من مزاياي
خليتني في مفترق طرق منجوم=ولاقوت يمناي تعطيك يسراي
يا حلم ياللي ماتجي مثلك حلوم=شفتك ثواني وآخر الحلم سلواي
جيتك وانا محروم واقفيت محروم=ماباح مكنوني ولا خارت قواي
مسك الختام دواي يا مسك مختوم=يبقى غرامك داي وعيونك دواي