المشاركة الأصلية كتبت بواسطة لافي

ياللي رمعت اللغز مانته قريبي=الضن لايخلف مع الوقت مبداك
لا تشيل غير الطَّيِّبَة ياصحيبي=بالعون ماهي يم مثلك وشرواك
غير أتمثل والمثل ما يعيبي=والعالم الله يوم أنا قلت ما أشناك
وأنا ضميري ياصحيبي رقيبي=وأنت صحيب وبالزلل ما تماداك
أدمح لك الزلة وضني مصيبي=وأهل المثل قالوا ولاضن يخفاك
من باع صاحب عند زلة عجيبي=ماقدَّر الصحبة ولا واجب أعطاك
هذاك مشيه لو تزاها معيبي=إن رحت مايفقدك وإن جيت سلاك
وهذاك صاحب لانخيته يغيبي=عند النوايب لاتحطه في يمناك
إن كنت طيب قال من طيب طيبي=وليا شكيت الحال قفَّى وخلاك
متغير الاوصاف لونه غريبي=إن جاب لك هذا قِصَر دون ذياك
وأنا أتعلم لافقيه وخطيبي=ولاني حسيب(ن)معتلي فوق الافلاك
أصيب وأخطي والله اللي حسيبي=الواحد اللي لاجزاني بيجزاك
هذا كلام الصدق ماهو غصيبي=أن كان معنايه مطابق لمعناك
من بعد شفت الذيب وسط القليبي=واجب على مثلي عن الذيب يحداك