ياصاحب الماثوق واصلـك منـي=سلام مـع تقديـر واصلـك منـا
وعليك شرسات الهجـوس اجلبنـي=وحاولت اعالج وضعهـن وابحلنـا
دليتهن درب الصـواب وعصنـي=وتجاوزن درب الصـواب وغزنـا
ودي برايـك كانهـن ضايقـنـي=اشقـى بهـن والا بـلاش اتعـنـا
والفاضيات ان جنبـن وان نصنـي=الفاضيه من نقصهـا مـا اشتحنـا
وشخصٍ حسب عرفه يبي يمتحنـي=عليه مسدود الفضـا مـن جهلنـا
لـو يدعـي ماعنـده الا الهبنـي=والكف الاملس ماغزى مـع مهنـا
خلك على حدك وعـش مطمئنـي=وخل القلوب انظاف وان زنت زنا
واسلوبكـم واسلوبـنـا يعرفـنـي=يامدعـي بالمعرفـه ويـن كـنـا
انـا حلـوم اللـيـل ماوهقـنـي=فكـر وعـد اخطـاك لا تستعنـا
دربك عليه اسباع كان انت جنـي=العلـم جـاك ولا تقـول اغدرنـا
ان طعتنـي والا عسـى ماتثـنـي=تلقـى نصيبـك يامـدور كفـنـا
وعلومـك اللـي قلـت مانسبنـي=ولو يصعدن يم السما مـا ازعلنـا
خـل الجـوارح ياللبيـب يهدنـي=قلتـم وقلنـا والسمـوع اسمعـنـا
قلتم تغنـى قلـت وشلـون اغنـي=قلتـم تغـزل بالـغـرام وتمـنـا
قلت اسمعو ماني على العـود فنـي=يـانـاس والله مالحنـكـم لحـنـا
وفنونكـم ولحونـكـم ماطربـنـي=واسلوب بعـض العاشقيـن يخفنـا
والبيـض لـو غازلتهـن مابغنـي=مالي بهـن رغبـه وهـن مابغنـا
به نـاس لاغنـوا يسـدون عنـي=اقلوبهـم فيهـا الـغـرام ايتثـنـا
احدٍ على بيـض السلـوم متبنـي=واحـدٍ غرامـه بالسفاهـه معنـا
وحـبٍ بـلا عفـه حلاتـه يكنـي=حتـي العقـول المايعـه ترجهنـا
وانا ماعم الناس في سـوء ضنـي=اخـص لـي نـاسٍ تفـح وتونـا
ناسٍ على الهامش طربهـم تمنـي=عشاق عـادة مـا وطنهـا وطنـا
واللـي بقلبـي حبهـن واشغلنـي=وهوايتي كـان الظـروف امكننـا
نقل الحـرار اللـي اليـا فرعنـي=وقـت الهـداد وبالهـداد شجعنـا
امصفيات الريـش عقـب ابردنـي=والوسم قد فـات اربعيـن اكملنـا
والحزم مبذر والفياض اخضرنـي=والجو بـارد والخشـاش استكنـا
وعقب العشا كشف البروق اعجبني=غرب وجنوب ويمة الجـدي عنـا
هذا الغـرام اللـي بقلبـي يحنـي=ذكر الحباري يـوم الاخبـار جنـا
عليهن اذكـار العسـوس اجذبنـي=من خور جـدلا قوضـن واشملنـا
ومالهن على خيران مسعود ظنـي=وبالجال مـن حـد السهـل وقعنـا
وسقنا بساقتهـن وهـن يدرجنـي=وتضايقن مـن طيرنـا واخمرنـا
يازينـهـن لامنـهـن كوبـرنـي=والطير يدبهن عقـب مـا اتعبنـا
وصدنا الجلايل والخفاف اسلمنـي=واطمولهـن بطيورنـا تقـل حنـا
وزان المعشـى والعـزب نزلنـي=والقـرم حضَـاي المعاميـل غنـا
ومع الشفـق دخـان نـاره يقنـي=وجاب الدلال وجـاب هيـلٍ وبنـا
وانساح صدري والهمـوم اعقبنـي=ربعي نشامـا والطيـور اعجبنـا
وصغيرنا يعـرف وقـار المسنـي=ماهو كسـول اليـا زهمتـه تونـا
والكيف طاب وزاول الهـم عنـي=هـذا الغـرام اللـي عليـه اتمنـا
واجسامنا عقب الكسـل ينشطنـي=ايـام ماشفنـا الدجـاج بصحـنـا
والقيـض كلـه بالبلـد مستكـنـي=مثـل السجيـن بعيشتـه ماتهـنـا
جسمي خشن مهما الظروف اجبرني=بالـبـر والا بالمديـنـة سكـنـا
ونساير العالـم علـى كـل فنـي=وشبنا واساليب الترف مـا اترفنـا