المشاركة الأصلية كتبت بواسطة محمد الفارس

سر ياقلم واكتب حروفي بقرطاس=واحذر يجي فيماكتبت أي تقصير
انظم حروفي عقد يزهى بالألماس=للصاحب اللي له معزّه وتقدير
الصاحب اللي خوته ترفع الراس=مصلح ولد برّاك غيث التباشير
أنا اشهد انه وافي وطيّب الساس=طلق الحجاج اللي تفرّد عن الغير
شاعر/ رجل/ مبدع/ مفكر ونبراس=حكيم من جملة رجالٍ مسافير
الطيب من صغرك شربته من الكاس=كاس الرجال اللي تسمّى المناعير
والمدح له ناسٍ تميّز عن الناس= وماكل من نمدح من اللي بهم خير
مايصلح إلا لك ياطير قرناس=في مدحك القيفان تلفي مغاتير
كل ماكتبت بيوتي بصدر كرّاس=تداحمن كلٍّ من الثاني يغير
وكلٍّ يبي متن القصيده على اساس=تقراه قبل الكل من دون تأخير
وكلٍّ يبي بالسبق يوصفك باحساس=من شان بأجمل بيت في مدحك يصير
تصاهلن أقوى من مصاهل أفراس=جاها نذير الحرب من دون تحذير
وجاني قرين الشعر حاير ومحتاس=يطلبني أختمها قبل أي تكسير
معذور مالومه ليا خاف الافلاس=ومالوم قافي لو يوقّف عن السير
أنته بحر ماياصلك كل غطّاس=وأفعالك تصدّر للأجيال تصدير
لو حاتم الطائي يجي يوم عسّاس=يمكن يروح يعلّم كليب والزير
إنه لقى هاللي جمعهن بلا قياس=كرم/شجاعه/مرجله/هيبة أمير
وسلام مني كل ماهب نسناس=وما اقول غير الله يذكرك بالخير