مما جرى للنفس عاتبت الايام = ببيوت شعر ن راجحات الموازين
عاتبتها بالقاف شاكي ومنظام = وياكم شكاها من رجال ن ميامين
إليا ذكرت صروفها عبر الاعوام = أونس بجوفي مثل فعل السكاكين
يامى غوينا والْتهينا بالاحلام = ويامى ضحكنا ماشكينا من البين
ويامى شربنا من زلال ٍ ولا دام = ويامى لعبنا في جميل البساتين
ويامى مشينا للهوى حفي الاقدام = ويامى عسفنا من مهارٍ مزايين
ويامى لهينا في مشاوير الأوهام = نطرد سرابٍ ماحصل منه تمكين
ويامى بكينا من تباريح الاعوام = ويامى طربنا في زمان ٍ لنا زين
ولاقد ذكرنا اللي للاطياب هدام = اللي على الموعد يجي يقضي الدين
الله يرحمنا ليا صاح زهَّام = وقال الوعد يافلان ما فيه تخمين
ولالك سوى ما سطَّّرن هاك الاقلام = اللي على يسراك واللي بالايمين
واللا برحمة خالقك رب الانام = ان كان جيت موحِّد وحافظ الدين
واللا تراك بصف عبَّاد الاصنام = ولا ينفعك مال ٍ ولا جاهك يعين
والوقت ياصاحي مطية بلا زمام = ما له ضمان... يسير بالزين والشين
عزي لمن دربه ملي ن بالاسقام = من وين أوجِّه بس ياوقت من وين
فكرت بالدنيا كما بعض الاقوام = وعرفت بن الموت له وقت ويحين
يامى نزل في قرم ساطيٍ ومقدام = ورْجال في وقت اللوازم شياهين
ويامى عثا في روس قوم ٍ وحكَّام = راحوا كما حلم ٍ توارى عن العين
وحنا بعدهم نسرج الخيل قدام = ولا حانت الفرقى مشينا ملبِّين
كل ٍ بياخذ مع هك الدرب مهزام = وياتي بعدنا ناس ماهم قليلين
ونبقى تحت ذيك الجنادل والاكوام = رهن العمل واللي جنينا من سنين
يارب ترحمنا ليا حان الاقدام = وتلطف بنا لا لحدَّونا المسلمين
واقفوا اهلنا بالحزن هم والارحام = يبكون والاجواد حضروا معزِّين
واخيرهم منهو دعالي ليا قام = واللا البكى ما رد للشيعة حسين
وصلوا عدد ما ذعذعن طرق الانسام = على نبي ٍ بيَّن الحق تبيين

عبدالعزيز بن دخيل الله الحربي