المشاركة الأصلية كتبت بواسطة أحمد الحربي

ياسعود عيني ما تهنت بالارقاد = لين اشرقت بالكون واضحى ضحاها
سرابي الهاجس بليلي ولاعاد= مع النجوم الساريات بسماها
ونارٍ بجوفي لو بها الني كد جاد = ويجود حتى اللي يمر بسناها
من بعدها! ماينقص الهم يزداد = زادة علي الهم لا واشقاها
مطية همومي لها خرج وشداد = تسرح وتضوي كل يوم بعناها
حاولت اهونها ولاشك مافاد = والله يامشكاي مدري وراها
درب الشقاء غصبٍ له الرجل تنقاد = تنقاد لو انك تخالف خطاها
لوهي مسافاتٍ طويله بالابعاد = لاهب نسناس الهوى واقتفاها
هذا واضنه يارفيقي بالاشهاد = ماحدٍ على وجه البسيطه قواها
يلوومني ياسعود خبلٍ وهرباد = حبال ورده قاصره دون ماها
ماخال مزنٍ ساريه دون رعاد = براقها ينبيه عن محتواها
ماتتعب مدور حيا عس ونشاد = ينزل بروضه قبل جفّت ثراها
بمثبتاتٍ في ضفافه بالاوتاد = شمّخ بيوتٍ مايركب ذراها
مدّ النظر بيشوف كان النظر حاد = وينعش 00 اليا هبت نسايم هواها
واليا ضفا ليلٍ على دنيته ساد = بضوّها غاية مناه وطراها
ومع غيبة نجومٍ على رش نداد = يسدل رواق البيت يحجب دفاها
ياسعود 00 لك مني تحية بلا عداد 0=0 بختامها 00 ومن الفها لين ياها!!

حي الجواب اللي لفى منك ياسداد = عد البشر واللي سكن وسط ماها
علي تشكي سارق الموق بعماد = خصم الجفون اللي منحي كراها
ذي عادته يا أحمد مدى الدهر ماباد= عايش على شوي القلوب وعناها
ومن لايحسه قاسي الوقت وش عاد = واليه في نفعه مخيب رجاها
دايم تشوفه بالشرابيك منصاد = وان شافله جره برجله وطاها
والغيمه اللي سجلوها بالارصاد = تنبت وتخضر ماأنتفع من كلاها
واليا قطنوا كل العرب جاك شداد = نبت الخزاما منقطع من شذاها
والليل لامنه ضوى مثل الاعياد = بالحظه اللي زاد عندك غلاها
تفرح كما تفرح على طفل ميلاد= ذيك الحنون اللي ترجي ضناها
وبيوته اللي شيدوها بالاسناد = لاشافها الهتاش نوخ وجاها
تستقبله بالعود مع بن وقناد = وغض الفقار اليا تقدم عشاها
ومن السعه بصدورهم مالها ماد= طب العليل اللي تعذر دواها
ومن لاملك يافلان من زين الاذواد = ماله على ذيك الفجوج وخلاها!!