السحيمي ينفض اللحية ويطوي في معمه=طار عقله من شليويح المطيري والزلامي
البعير اللي يشيل الحمل عود يرضع أمه=بعد قالوا شامخ النيبان مردوم السنامي
السحيمي يوم غنى حطكم في راس كمه=ثم خلاكم عجينه كن مافيكم عظامي
الجمل يمشي على الدرب وكلامك مايهمه=من هديره قمت من نومك وحرمت المنامي
الزمان اللي ستر حالك وحالي لاتذمه=والحرم من دونه المسعى وبيبان السلامي
أنت داب كل ماحرك شدوقه سال سمه=والله إنا مانذوق السم يالداب التهامي
أنت ذيب تكره البارود لو إنك تشمه=ماتحب النور الأبيض ماتحب إلا الظلامي
الطعام اللي ليا شفته على صدرك تضمه=لاتقول إنه حلال ولاتقول إنه حرامي
علموا صياف لايتبع خفيف الظل عمه=دام أنا وياه فالمذهب وفي الطرقة ليامي
قله إنا مانبالي اللي بنا نقال نمّه=بعد عود بايعة بين القبائل مايسامي
أنت أشوفك كل ماتسرح تضوي لك مطمه=تحسد المسلم على دينه ليا صلى وصامي
لايزعلك الكلام اللي عسى ربي يتمه=ثم بده مستريح بلا شراب ولاطعامي
كل شئ في طريقك يا أبيض الشارب تخمه=لين ضيعت الفشق والبندقية والحزامي
إن نثرت القش ياصياف ماتقدر تلمه=وإن قربت من العرب ميسمك جوف النار حامي
لو يبي يتركك على باب الخزينه رحت يمه=وإن نظر لك نظره حمراء تعديت النظامي
المسافر مايطب البحر لين إنه يطمه=يذكر الله في بلد مكه ويلبس له إحرامي ,,