يوم جابتنا اليالي ياسلام الله برده =من حقوق الله على اللافي يباشر بالسلامي
بشتري وأبتاع لو لي عن جبال طويق مده =هي تجي بالوسط وان منتحي قبله وشامي
البقاء بالشاعر اللي يوصل المكيال حده =عالم ٍ يحفظ كتابه مع مفسرة الحلامي
من جبال طويق حتى تنتهي في بحر جده =البلاد بلادكم والأصل يعرف بالأسامي
ما يهون التاجر اللي يعطي الطلاب سده =مايبور بعملته لو دونها عشرين عامي
الوفي يافي ليا جاب الوفى خاله وجده =ويش بصرك بالجمل شقران مردوم السنامي
أكثر التجار خسروا بالسنين المستجده =والسبايب يالعجي خلط الحلال مع الحرامي
الجمل شقران يبرك والوسيمة فوق خده =قادها اللي قادها لين لحقت مخ العظامي
الحكيم ليا بنى بني الشرف ماقط هده =والعرب تعرف شعاع النور جلاي الظلامي
أنت ياللي جبت لي العلم في طرقتك وده =قالوا انك ياصليب الراي ميبوس الحزامي
أنته الرجل الحكيم اليا تلووا بالأشده =والعرب تارد على الحجه مثل ورد الحيامي
مانودي علم مابرق عميلي في مرده =العلوم محدده ومعقدة وأفهم كلامي
أنت متحكم وسيف ذياب تدري ليش حده =والعرب نامت ونقال الوداعة ماينامي
العرب كلٍ فصل ثوبه على طوله وقده =غير ذاك اللي مرامه مايوافق مع مرامي
خابر انه يوم حده للبلاوي دوب ضده =علم اللي ماتفيد إبه النصايح والعلامي
أشهد الوقت يامعيض العجي ماعنه صده =بس لو أحركه يزعل خوالي مع عمامي