البارحه والنوم عن موق عيني= ابعد من النجمه عاى قاع هداج
عني غريب ومانعه لا يجيني= سم الخبر من ناب الاقدار بجاج
من جايبه لو مايجي كلمتيني= مرارته غطت على مر الاحداج
وقعه سهم مسموم با اقصى كنيني=على يباس الكبد با السم زجاج
خلاني اسهر والملا نايميني= والقلب كن امولع (ن)فيه وهاج
والعين هلت كل دمعن ثميني=على خدودي كنه السيل ياراج
غيم سحاب الهم والحزن شيني=ومن خاطر(ن)محزون دونت الانتاج
على اثنين(ن)مابعدهم اثنيني= مثل البيارق فوق هامات الابراج
راحو ولا حنالهم محتريني=راحوا مثل ماقبلهم راحت افواج
امسوا تحت طبق الثرى ساكنيني=ماكن من فوق الثرى واحد(ن)داج
لحقوا وحنا بعدهم لا حقيني= ومن عاش با الدنيا له الموت منهاج
حق ويقين وسنة العالميني= الله خلق هدام للخلق لهاج
يا وقفت الساعه بوقت(ن)يحيني=عن مايبي مايمنعه خوف واحراج
رمى علينا رمح ابو سنتيني= وغير الطويل الي هدم نزل احجاج
جب العزى في غفلت الغافليني=وقفى وخلا حيهم يرهج ارهاج
خلا المصيبه تحسب امصيبتيني=اخذ بريق السيف وانصابه العاج
لو ما القدر يومن به المومنيني= امن الفجيعه يمرج العاقل امراج
يا ليت لو يحسب لهم من سنيني= في مثلهم للعمر ماني بمحتاج
حيثنهم معنا سيوف اليميني= ولا غابت القمرى لنا نور وسراج
مثل نهار(ن) فيه لحق المتيني= يوم ان كل (ن) خاف صلفات الامواج
يوم السكوت ينجي الساكتيني= والحق بين مثل ابانات واسواج
خلاه ابو سلمان علم(ن)يقيني= با امهند(ن)لمصندق الجوف فجاج
رد الحقوق وعاقب المعتديني= ما خاف من حكم(ن) مثل حكم حجاج
مخبور فعله والملا خابريني= يا كم عدل مايل (ن)عقب منعاج
بقلوبنا حيين يا ميتيني= لو غاب عنا شوفكم ذكركم هاج
وحكم القدر مقبول شينن وزيني= ما الله جعل عن حكم القدار مدراج
والدايم الله والملا ذاهبيني= مات الضعيف ومات من يلبس التاج
ودنيا الفنا يكسب بها المتقيني= قبل الحساب وقبل تفتيش الادراج
كل(ن)يواجه ما جنته اليديني=ويلقى التقي في حسن الاعمال مفراج
ناس(ن)بجنات الهنا خالديني = وناس(ن) بنار(ن)سيج من فوقها اسياج
يا جعل موتانا من الفايزيني=عسالهم عن حامي النار مخراج
يا قابل التوبه من التايبيني= يا فارض(ن) وقفة عرافات للحاج
في رحمتك يا ارحم الراحميني= ياراحم الي في رجا رحمتك لاج