البارحة ناظرت لـي ياسمينـة=قامت تطالعني وأنا أقـول ياحُّـول
باصد وأقفي وأستعيد السكينـة=لكن جبرني للنظـر فـارع الطـول
وظليت أناظربه وعيني بعينـه=كني هويته يوم ناظر علـى طـول
وقلبي ما كل انسان يملك حنينه=لكن ترى للحب بالعيـن مرسـول
والحب لو له في زمنا مدينـه=يلقى بها عن ضايق الوقت منـزول
أنا أشهد إن القلب بأوسع كنينه=منزل لروح الحب وإحساسي يقول
ياكم عشقت من الغنادير زينـة=وياكم حصدت من العذيِّات محصول
وياكم لقيت من الهوى مايشينه=وأكبر عذاريب الهوى فقد مجمـول
والليل يسري والعمر في سْنينه=وراع الهوى معذور لو صابه ذْهول
والحب عشنابه ليال ٍ حسينة=واليوم كن أوروده النّفّّـس ذْبـول
ويانايف اللي شفتها بالمدينـة=فايق حلاها شـي ماهـو بمعقـول
خصرٍ نحيل وعود مايس بلينه=وعينِِ هدبها حدر الأجفان مسبـول
ياسعد روحه من تصلهـا يدينـه=أنا أشهد إنه نال له يافتـى نـول

أهـلاً بـراع القـول راع الثميـنـه=مرسل زحول بيوت شعـره بمدلـول
مرسـل كـلامٍ شفـت فيـه الغبينـه=من شوف رعبوبٍ كما السيف مصقول
سيـفٍ بـلا رحمـه براحـة يمينـه=وصوب عروق القلب والقلب معلـول
مع طوله إلْه خصور ماهـي بدينـه=أقفت وهو أقفي وعينه علـى الـزول
نقَّض جـروح بوسـط قلبـه دفينـه=وجرح الهوى لو بان لك ماله حلـول
ماله دواء جرحـه كمـا الغرغرينـه=إسأل مجرب حال حظه عنـه حـول
كل الكـلام اللـي حصـل مدركينـه=والعين عرضه للشقـا قـول وفعـول
وأنته وأنـا بحـر الهـوى سابحينـه=والكل منا وسطـه يصـول ويجـول
تشكي وأنا أشكـي واكثـره دافنينـه=وآخر ماشفت الله عليه (بستي مـول)
صابتنـي أهدافـه وقفـَّت مديـنـه=بأهداف ملعوبه كمـا أهـداف راؤول
وشتت جميـع أوراقـي بـْلا عبينـه=وادمت شباك القلب قـولٍ وراء قـول
ماعاد اميِّـز قلبـي اصبـح رهينـه=تبيني ادور وراء هذي حلـوووووول