المشاركة الأصلية كتبت بواسطة زيد بن مبشر الحصني الحربي

مع التحية و التقدير للشاعر/زيد مبشر الحثل

يابو فهد هاضت قريحة اشجوني=وجهتها يمك مشوره ومسيار
ياخال للراي السديد ادفعوني=يابن الرجال اللي لهم فعل واذكار
ربعٍ ليا جاء ذكرهم يمدحوني=لهم بصرح المجد مارد ومصدار
قل للصديق اللي عليه اجلبوني=ناسٍ بلا ذمه خمايم وفجار
وأنا ليا من الخبول اظلموني=اغضي عن الهفوات شيمه ومقدار
مقدار للي غيرهم شيموني=ما ضيّع الشيمه على شان ثرثار
لو إن تجار الحسد ما ازملوني=انا لجن مذبذب العقل حشار
ماني سفيهٍ ليا بغوا حركوني=ما أثوّر البندق بلا قن وعيار
وسواعدي ما جرحتها سنوني=وعلى القبيلة ماتبختر تبختار
وان جضة اصوات الضواري نخوني=لاهب من نفخ العدا عج وغبار
تسهر على شان القبيلة عيوني=ما ارضى على ربعي مقابيس الاشرار
وان جاء الخبر ما يقصر العلم دوني=لي ماقفٍ من عرض وافين الاشبار
ولا رد شذرة حربتي في متوني=عقلي معي واعرف عدوي والانصار
ولا عارض اللي ما تدخل بشوني=ولا اضيع اعمالي على ذم الاحرار
وعلى النشاما ما تغير ضنوني=في حال متواضع وفي حال جبار
اعرف بياعي وعارف زبوني=ولا اجامل اللي صحبته غش واقمار
ولا اشفق على الجهال لو صاحبوني=اللي تغيرهم وساويس الافكار
ما ارجي شفاعتهم وهم ما رجوني=وعرفي مكفيني ليا صار ما صار
ولا اركض ورا الزيلان لا جنبوني=مثل الذي يلهث ورا كل مرار
وكان المهبل في غثاهم بلوني=طير الفلاح ليا رميناه ما طار
ولو هربدوا في غيبتي ما ازعجوني=الناس تعرف بالمشاهد والاخبار
وعقلي معي ماني بغوج ٍ مجوني=ولاني سفيه يرمي الملح بالنار

الرد على قصيدة الشاعر الكبير/بدر الحويفي

في خط ابو سلمان لو بشروني=سقت البشارة بالخبر سر وجهار
لو كان مما فيه واطول كوني=من المستشار اللي يبي مني الشار
ويقول بالراي الرشيد ارشدوني=واقول ياستار بالوضع وش صار
ويقول خوذوا ما تبون وعطوني=واقول ياعلام ما تخفي الاسرار
وبعض الرجال استغربوا و انشدوني=عن شامخ النابين و اقول عيّار
اللي دفوفه بيضتها المنوني=يا بعد مضرب خطوته كل ما ثار
واللي يجارونه يبا يتعبوني=هدار يفدر لا هدر كل هدار
قال ازهلم ريع العدى وازهلوني=لا هاب جوهرة البحر كل بحار
واللي يقول بمبركه نوخوني=ماهو بدر عواد بالماقف الحار
يابدر تجار الحسد ما اعرفوني=وكباير الأنذال بعيوني صغار
ماني معاملهم ولا عاملوني=ولا افطر بوقت فيه ممنوع الإفطار
تكفى عليك عداك لا يفرحوني=بعض البشر بسياسة الشر شطار
واللي يبا يشريك باللي يهوني=قال المثل ما يشوي الصقر صقار
هذا وانا ما ادري من اللي تعوني=ابشر بطيارة قذايف وطيار
والدقن والشارب تراه محسوني=ان كان تاسع زيد عن بدر الأعذار
يفدا الحويفي كل ما بمخزوني=دام القريحة ما اعلنت صك الاعسار
لوقلت له يا عم..عم و يموني=قضاب جنبيه مع الوالد البار
ياللي تبون مفارقه فارقوني=الأول المعذار والثاني انذار
اقول واقابل واقول اسمعوني=بثي كلامي يا محطات الاقمار
ماني بقايل لازعلوا سامحوني=مبصر ولا جاريت عميان الأبصار
أما الخبول اموت ما بايعوني=إلا ان رقم الذاكره عندي اصفار
الى امسح عقلي بهم سرحوني=وقولوا تحول راعي الحصن حمّار
اما لابو وجهين لا واجهوني=عطيتهم وجهٍ من النور و النار
واسلم لعل عداك ما يسلموني=ونخطي ونستغفر و الإله غفار

وتقبلوا تحياتي