يالله عسى دمعك طهاره وتكفير=يالجادل اللي كان هو راس مالي
غضِ صغير وفاق بطش الجبابير=ربان في بحر الهوى مايبالي
عزر خفوقي فوق حامي المجامير=ولاقلت أه ولابعد ويل حالي
اربع شهور ادرى واكابر بتدبير=واقول ماحنيت للي فبالي
وانا وقلبي والمشاعر مساهير=الناس ترقد والغضي في خيالي
ياشوق انا عشقي تعدى المحاذير=غطى على كل المحبين جالي
وياشوق لكِ بالقلب حشمه وتقدير=ولكِ بالخفوق رياض ورد ونفالي
لو لقلت احبك ياعقيد الغنادير=فانا مقصر يابعد كل غالي
مير انت ياخلي تحب التكادير=تقسى وتتغلى وبدرك هلالي
لو شفت عيني يوم تدمع مهامير=ماكان تجرح صاحبك ما تبالي
ياشوق احبك لو تدور الدواوير=وادري بانه صار وصلك محالي
تطري على بالي وادور معاذير=وادري بانك ياهوى البال سالي
خذني جعلني فداك لو رمح مغير=ارمي صدور عداك واشفي علالي
ماظنتي تلقى مثل حبي كبير=وماظنتي مثلك يقدر فعالي
ودي اغمض وافتح العين ويصير=حضنك فراش وسود هدبك ظلالي