باسمك إلهي بديـع الكـون خالقهـا=صلي على احمد رفيع الجد والشـان
وفِّق لها في طريق الحق واحفظهـا=من كـل ذي نزعـةٍ للشـر خـوان
بالعقل والصبـر والأخـلاق هذبهـا=كل من فقدها سلك في درب شيطـان
من يتبع النفس يهلك في طلا يبهـا=يطلب حقوقاً وهو في الحق غرقـان
ومن تعلق بأمـره فـي صغايرهـا=في الحق يظهر قصير الباع والشـان
خلِّ العنيد الـذي نفسـه مضيِّعهـا=يتبـع هواهـا ومالـه قـط ميـزان
لا تشتقي لبايـعٍ نفسـه لعارضهـا=واحفظ جهودك لذي فضلٍ وعرفـان
شحن النسا والسحر كل من يتابعهـا=غايب عن العقل خارج رتبة انسـان
يهذي بقالات مـا يعـرف عواقبهـا=سراير الخبث تنشي عقـول صبيـان
لكن طناشك لها في الحـال يحرقهـا=يظهر لها وش حقيقة طبعها الدانـي
عمر النسا ما تقود رجـال غيرتهـا=إلا إذا ارخى بـراس الـذل رغبـان
لاتستخف كيدهـا واسـرار نقمتهـا=تغوي حليماً قهر تسعيـن شيطـان
واكبر مصيبة كبيـر القـوم يَتْبَعهـا=وفي غيها يرتجي طاعـات واعـوان
يخلف مسار الحقايق عن مواردهـا=يطفي بها غل يزفـر مثـل بركـان
للنفس مضمونهـا تحـده ملافظهـا=بأضغانها يستحيـل الطيـب لادران
يجحد على الناس أصل حقوق راعتها=يقول نخوا لنـا وصاحبكـم الجانـي
والحق سامي وحكمه فـوق حجتهـا=في رجعته يستفيد الفصـل برهـان
من لا سمع من رجال الطيب طيبهـا=بكل تأكيـد يسمـع هـرج نسـوان
ينسى مواجيـب للرحمـن شرعهـا=وما في حاله عن المـدات كسـلان
يبعد عن عهـود وعلومـاً تعلمهـا=وينسلخ مـن أثرهـا سلـخ ثعبـان
ما يقتدر للغريـب العيـن يرفعهـا=أما الولايـا لهـم بالقـرب طغيـان
يبـدي الرجولـة بعـاداتٍ يخالفهـا=على كسير الجنـاح بقلـب نشـوان
والنفس دون الرجولة في عوايقهـا=ويطير للمنذلة مـن غيـر جنحـان
دون القرايب يبـي عـزّاً يشرفهـا=يلجا لاجانيب فـي كبـرٍ وعصيـان
سهل الدروب يتعارض مع رغايبهـا=ويحدها العسـر فـي ذلٍّ وحقـران
من لا عرف له كبيراً حال موجبهـا=تصغر فعاله مع الأقصيـن والدانـي
حب الظهور لحياض الموت يوردهـا=والدرب في الدين ما يحتـاج تبيـان
ربع المناظر تغطي عـن مخابرهـا=والعين تظهر خفايا النفـس بالـوان
تعطي القضايا وتبدا مـن كبايرهـا=وفي الحقيقة ترابـاً فـوق صفـوان
بين المواقـف لهـا قـولاً يغايرهـا=تكذيب وانكار لو من شوف الاعيـان
ورا الخفايا تجـس اخبـار مطلبهـا=وتضفي على هاجس الشيطان بنيان
من تافه أفعالهـا تظهـر ضغاينهـا=ما تجلب الجيفة إلا أشكـال غربـان
ما تقبـل الحـق وتعانـد حقايقهـا=ما يحجب الشمس نزع وقول شهواني
ما ترتجي الخير ياتي مـن فعايلهـا=والحرص بادي على النظرات عنوان
نار الحسد زادها من قلـب مشعلهـا=دخانها يفضح اللي بحرهـا معانـي
سريعـة الـرد والشيطـان يلهبهـا=قطاعة الرزق هدم بيـوت واوطـان
لا تحـزن إلا لـذي قيمـة مقدرهـا=في منهج العز ما يُشـرى بالأثمـان
لله سنة علـى اهـل الأرض قدَّرهـا=الظلم وارد قصاصـه قبـل الاكفـان
هذي بلايـا ومـن ياخـذ بواحدهـا=عليـه مابـه حسافـة بيـن خـلان
لوجابك الحظ صدفـة درب راغبهـا=أبعد ولو بالخسارة وانـت ربحـان
ما بال من حازهـا جملـة بكاملهـا=كيف يتجرَّا يواجه غـرب وأعيـان
لكن لنا في الدعا يهـون مصايبهـا=وارجو الهداية لهم من رب رحمـن
منَّا النصيحة بها لو كـان يرفضهـا=ثوابها عند مـن يجـزي بالاحسـان
وخلاصة القول ياللي بحـق تطلبهـا=من قلب صافي بحب الخير عمـران
خذها سحابة فكـر لاحـت بوارقهـا=ما تنفـع إلا جديـر بمـد الايمـان
أما نفوس الخبث تشكـي مضرتهـا=ما يتفق مع ريـاح الـورد جعـلان
من حب دنياك والخـوض بمفاتنهـا=كل المشاكل تجي من هـم واحـزان
ومن يتق الله تسهل لـه مخارجهـا=إذا النوايا صفت بأفعـال وإحسـان
وأعمالنا طالبـك يـا رب تختمهـا=بالصالحات وترجـح كـف ميزانـي
واطيب صلاةً على المختار شافعهـا=أرجو بها البعد عن لفحـات نيـران