المشاركة الأصلية كتبت بواسطة سالم الدلح

الود لو نرجع ليا عام الالفين(=)ونعيد في هالعام ترتيب الاوراق
وآعاشر الطيّب واكب الرديين(=)واعرف عدوي واحرق الصحبه احراق
مشكلتي اني ماعرف صاحبي مين(=)لان الصداقه صارت جسور وانفاق
الصاحب اللي صار عمله لوجهين(=)اكيد تالي صحبته تصبح فراق
وانا ادري انه مثل حالي كثيرين(=)الوضع مؤسف مابنا شخص ماضاق
هذاك شايب يشتكي حاله الشين(=)ماالله رزقه الا ولد واحد وعاق!!
من بعد مارباه ذاق الامرين(=)الابن عاق وجسم شايبه منعاق
وذيك اللحى تنطر بلوغ الوراعين(=)مير اصبحت في هالزمن حقل الاذواق
لانهم بعد ماكملو فوق عشرين(=)عزّة لحالهم جزها موس حلاق
وهذاك يشكي من فراق المحبين(=)يقول فرقا البنت ماعاد تنطاق
وسبب غياب البنت تغيير روتين(=)ويوم اكتشفها قام يلعن بالاشواق
وهذاك حاكم شعب كله مساكين(=)حاكم طغى في شعب جرحه بالاعماق
ياعراق وضعك صعب لايمكن يزين(=)صدام مات وبعدها ضعت ياعراق
يعني كثير اللي انصدم من عزيزين(=) مافيه واحد من غثا الوقت ماذاق
ياقلبي الطيّب امانه على وين(=)في هالزمن يسلك عديمين الاخلاق
ماانلام اجل لو ماعرف صاحبي مين(=)دام الصداقه صارت جسور وانفاق
وماعاد تنفع دمعة العين ياعين(=)وماعاد نرجي شمس الآمال باشراق
وماعاد تنفع (ليت) ياعام الالفين(=)وماعاد تنفع فيك ترتيب الاوراق