يوم الخميس اللي به الناس فرحين = سير على خدي من العين ضيفان
قلت القضيه وش حصل قبل يومين = قالوا خذ الاخبار من عند مران
ناديت يامران هات العناوين = هات العلوم الكامله دون نقصان
قال العلوم تحصله بين ظلعين = اما بفغانه او الظلع فرثان
مريت فغانات بين الصلاتين = وازهم على اكبر ظلع من بين ظلعان
قلت اوجز الموضوع لاتقول بعدين = بالمختصر مادامني حيل عجلان
قال الغبيه حالها صايرن شين = تبكي على اللي صار فمشاش جاوان
جيت المشاش وسال دمع من العين = مالوم عينٍ دمعها فوق الاوجان
ناديت انا يامشاش ودي تعزين = قال العزى واجب عليك انت يافلان
الله يعظم باجرنا بالعزيزين = راحوا وخلوا دارهم هي والاوطان
مرحوم يانسل الرجال الشريفين = يامكرم الضيفان ياطير حوران
ياالله يامنزل لنا اية الدين = ياخالق الانسان ياخلق الجان
انك تنزل خالي المنزل الزين = وتوسع بقبره على مد الاعيان
وتهديه جنات ونخيل وبساتين = جنات عدنٍ به يطوفون ولدان
ومن لام عيني قال له ليه تبكين = بقول له ياصاحبي حيل غلطان
تبكي على فقد الرجال الوفيين = مالومها لو هي بكت عدة ازمان
وعداد ماطافوا بمكه ملبيين = من ربهم يرجون رحمه وغفران
صلوا على المختار سيد النبيين = شفيعنا المختار من نسل عدنان