تعذر وصوله داخل بالحي قوقل ماب
وانا خابر انه يوصل العلم منهاته
نشدته وقال انشد محيطه عن الاسباب
احدث ومايطلع لي البيت وثباته
وقست الامور بكل دقه مع استغراب
تصفحت بالارشيف كامل ملفاته
عرفت الرساله دون تعرب من العراب
عليها بعد دققت حمرا بصماته
ورى ماورى باقي لها الحين بالسرداب
عسى النايم اللي نام يصحى من اسباته
بعد ماكتب من القوافي ماحاز وطاب
تذكرت من يفرق بطيبه ونظراته
نهار الله الله مايسجل مع الغياب
رفيق وصدوقٍ ماتشوش قناواته
هذاك الوسيدي راعي السيف والمشعاب
عليه السلام ورحمة الله وبركاته
سليمان ريف الضيف ومورد الهياب
نضيف السريره حي راسه وهوماته
شقيقه لهاب الله يطول بعمر الهاب
عسى سيفنا المجرود تبطي سنواته
على ساحة الشعار مع حرب والاجناب
تعلا على قمة طويق وسرواته
مايتبع لحزب وراس ماتروسه الاذناب
مجمل ويعجب كل حربي بوقفاته
ماعاد الغشيش اللي نوياه ريش غراب
لكنه يعرفه لو ضحك من حركاته
من القلب يالهاب الوسيدي بدون حساب
تحيت غلا ماهي سواليف قتاته
وانا عدني وقت الشدايد شبا ونصاب
نهار العدو يحشد على الحد قواته